Paralajmërim nga Mbrojtja Civile: Përkeqësim i motit dhe rrezik për përmbytje në disa qarqe të vendit

Kushtet atmosferike në territorin shqiptar pritet të pësojnë një kthesë drastike gjatë orëve në vijim, duke sjellë reshje të dendura shiu dhe stuhi që do të përfshijnë pjesën më të madhe të vendit. Parashikimet e fundit meteorologjike tregojnë se situata më kritike do të përqendrohet në rajonet veriore dhe përgjatë vijës bregdetare qendrore. Në një njoftim zyrtar, Agjencia Kombëtare e Mbrojtjes Civile, duke iu referuar të dhënave nga Instituti i Gjeoshkencave (IGJEO), bën të ditur se përgjatë pasdites së sotme, më 8 tetor, dhe përgjatë gjithë ditës së nesërme, më 9 tetor, qarqet Shkodër dhe Lezhë do të përballen me reshje shiu nga intensive deri lokalisht shumë intensive, ndërsa qarku i Durrësit do të ketë gjithashtu reshje me intensitet të lartë. Ndërkohë, për qarqet Kukës, Dibër dhe Tiranë, IGJEO parashikon reshje me intensitet mesatar deri lokalisht intensiv. Në qarqet e tjera të vendit, situata e motit do të paraqitet me reshje shiu të nivelit të ulët deri mesatar. Reshjet e dendura do të shoqërohen me shtrëngata në pjesën më të madhe të qarqeve, duke ngritur alarmin për probleme të mundshme në infrastrukturë dhe zona të banuara. Zona e Veriperëndimit mbetet më e rrezikuara, pasi prurjet e larta ujore mund të sjellin bllokime të menjëhershme dhe përmbytje lokale. Sipas strukturave të Mbrojtjes Civile, këto reshje në formë shtrëngatash mund të shkaktojnë vërshime të shpejta të ujërave në mjediset urbane, përmbytje lokale dhe rrëshqitje të dherave, me rrezikun më të lartë të përqendruar në qarqet Shkodër, Lezhë dhe Durrës. Përballë këtij skenari të rrezikshëm meteorologjik, Agjencia Kombëtare e Mbrojtjes Civile ka lëshuar një thirrje urgjente për banorët e rajoneve të rrezikuara, duke u kërkuar atyre të jenë maksimalisht vigjilentë dhe të kufizojnë lëvizjet e panevojshme. Autoritetet u bëjnë thirrje qytetarëve që të tregojnë kujdes të shtuar, të mos afrohen pranë lumenjve, përrenjve apo zonave të tjera me risk, dhe të shmangin çdo tentativë për të kaluar nëpër akse rrugore të përmbytura. Gjithashtu, bëhet thirje që qytetarët të ndjekin me vëmendje udhëzimet zyrtare nga autoritetet vendore dhe strukturat e mbrojtjes civile. Në rast se përballen me çdo situatë emergjente, qytetarët këshillohen të telefonojnë pa vonesë numrat pa pagesë të shërbimeve të emergjencës për të kërkuar mbështetjen e autoriteteve.