Gianni Infantino premton fonde të reja dhe mbështetje të pakursyer për futbollin afrikan

Kreu i shtëpisë më të madhe të futbollit botëror, Gianni Infantino, ka garantuar angazhim dhe financime shtesë për ngritjen e këtij sporti në kontinentin afrikan. Këto deklarata, presidenti i FIFA-s i bëri të enjten në Cape Verde gjatë një konference për shtyp, ku ishin të pranishëm drejtuesit e 54 federatave që bëjnë pjesë në Konfederatën Afrikane të Futbollit (CAF). Ky organizim shërbeu si një ngjarje kyçe strategjike për sportin në këtë rajon, duke i dhënë njëkohësisht mundësinë numrit një të FIFA-s që t'i drejtohej një pjese të rëndësishme të elektoratit në prag të zgjedhjeve presidenciale të vitit të ardhshëm. Gjatë fjalës së tij, Infantino solli në vëmendje investimet e deritanishme të institucionit që drejton që prej marrjes së detyrës në vitin 2016. “Si president i FIFA-s, jam krenar që së bashku me ju kam kontribuar sadopak në këtë revolucion të futbollit afrikan gjatë 10 viteve të fundit”, u shpreh ai. Ai veçoi programin FIFA Forëard, përmes të cilit theksoi se janë derdhur afërsisht 1 miliard dollarë në Afrikë gjatë kësaj dekade, duke mbështetur 124 projekte të ndryshme dhe iniciativa të tjera zhvillimore. Edhe pse kreu i FIFA-s nuk e përmendi drejtpërdrejt nismën e diskutueshme për tregtimin e një pjese të të drejtave televizive për turnetë e organizatës – një plan që u pezullua pas kundërshtimeve të forta nga shtetet evropiane dhe ato të Amerikës Veriore – ai bëri thirrje për bisedime konstruktive kur ka mospajtime. “Kur kalon një rrugëtim, ndonjëherë ngrihen shqetësime. Kur ato shfaqen, duhet t’i adresojmë. Ne në FIFA i trajtojmë gjithmonë përmes dialogut, me krahë të hapur, zemër dhe mendje të hapur. Gjithmonë mund të bëjmë më mirë”, shtoi ai. Në fjalën e tij, presidenti rikonfirmoi përkushtimin e organizatës për të nxitur përparimin e futbollit afrikan dhe për të zgjeruar perspektivat për federatat kombëtare. “Angazhimi ynë është të sigurohemi që futbolli juaj të vazhdojë të përmirësohet dhe të rritet, duke krijuar më shumë mundësi. Dhjetë vende afrikane në Kupën e fundit të Botës ishte një sukses për të gjithë kontinentin”, u shpreh ai. Në fund, Infantino u bëri thirrje autoriteteve të CAF që të qartësojnë nevojat dhe prioritetet e tyre për të ardhmen. “Ne duhet të vazhdojmë së bashku në këtë rrugë. Ju takon juve, si CAF, të na tregoni se çfarë dëshironi dhe si mund t’ju bëjmë më të fortë e më të mirë”, theksoi ai, duke shtuar se do të vijojnë kërkimet për burime financiare shtesë me qëllim ngritjen e futbollit afrikan në majat botërore.