Përmbyllja e turit rajonal, Von der Leyen: BE-ja po përgatitet për valën e re të zgjerimit

Presidentja e Komisionit Evropian, Ursula von der Leyen, ka përmbyllur zyrtarisht vizitën e saj dyditore në Ballkanin Perëndimor, një angazhim që përfshiu ndalesa në Shqipëri, Kosovë, Mal të Zi dhe Maqedoni të Veriut. Gjatë bilancit të këtij turi rajonal, ajo vuri në dukje domosdoshmërinë që vetë Bashkimi Evropian të jetë i mirpërgatitur për procesin e ardhshëm të integrimit, duke i dhënë prioritet mbrojtjes së parimeve demokratike dhe sundimit të ligjit. “Ne duam të sigurohemi se Bashkimi ynë Europian të jetë gati për t’u zgjeruar dhe ne do të përcaktojmë se si t’i mbrojmë më mirë ato që ndodhen në zemër të Europës, që janë vlerat tona demokratike dhe shtetin e së drejtës”, u shpreh ajo gjatë qëndrimit në kryeqytetin shqiptar. Kreu i ekzekutivit evropian e pati nisur këtë itinerar pikërisht nga Tirana më 30 shtator. Në daljen e përbashkët për mediat krah kryeministrit Edi Rama, ajo vlerësoi hapat konkretë që ka ndërmarrë vendi drejt familjes evropiane, duke bërë thirrje për ruajtjen e ritmit dhe vijimin e pandërprerë të reformave.