Drama e minatorëve nën tokë, deputeti Ramadani kërkon llogaridhënie nga ekzekutivi pas bllokimit të 63 punëtorëve

Deputeti i Aleancës, Burim Ramadani, ka reaguar ashpër pas incidentit ku 63 minatorë mbetën të ngujuar në horizontet 8, 9, 10 dhe 11, si pasojë e djegies së një trafoje elektrike në tunelin e parë. Edhe pse shprehu lehtësim që gjendja e punëtorëve përfundoi pa pasoja dhe se ata shpëtuan, Ramadani paralajmëroi se do të kërkojë përgjegjësi institucionale nga Qeveria për këtë ngjarje të rëndë. "Kjo nuk ishte hera e parë që minatorët tanë – krenarisë së nëntokës së Kosovës – u ndodh të ngujohen në qindra metra thellësi. Problemi me energji elektrike nuk duhet të trajtohet si problem teknik. Asessi. Përgjegjësi duhet të ketë", ka theksuar Ramadani në reagimin e tij.