Kombëtarja luan sonte në “Air Albania”, Policia e Shtetit zbardh planin e masave dhe rrugët e bllokuara

Kombëtarja shqiptare e futbollit do të zbresë në fushën e stadiumit “Air Albania” mbrëmjen e sotme, ku do të përballet me San Marinon duke filluar nga ora 20:45. Për mbarëvajtjen e këtij takimi dhe garantimin e rendit publik para, gjatë dhe pas ndeshjes, Policia e Shtetit ka hartuar një plan të posaçëm masash, mbështetur në eksperiencën e deritanishme të menaxhimit të ngjarjeve të mëdha ndërkombëtare. Për të shmangur bllokimet dhe për të lehtësuar qarkullimin e automjeteve në kryeqytet, autoritetet policore në bashkëpunim me Policinë Bashkiake të Tiranës do të zbatojnë kufizime të lëvizjes rrugore. Duke nisur nga ora 17:00 e kësaj pasdite e deri në përfundim të përballjes sportive, akse të caktuara pranë impianteve sportive do të jenë të mbyllura për mjetet. Konkretisht, segmentet që do të bllokohen përfshijnë Bulevardin “Dëshmorët e Kombit” (nga fast food-i “Laguna” pranë urës së ish-Hotel Dajtit), rrugën “Papa Gjon Pali II” te kryqëzimi i RTSH-së, rrugën “Dervish Hima” dhe “Asim Zeneli” pranë Ambasadës së SHBA-së, hyrjen e rrugës “Themistokli Gërmenji”, si dhe rrugën “Ismail Qemali” te kryqëzimi i RTSH-së. Gjithashtu, kufizime do të ketë edhe në rrugën “Lekë Dukagjini” pranë ish-Gardës – e cila do të shërbejë vetëm si korridor hyrjeje për parkimin e mjeteve të autorizuara nga FSHF-ja –, në rrugën “Abdyl Frashëri” pranë Librit Universitar, ndërsa te sheshi “Willson” trafiku do të devijohet drejt rrugës “Sami Frashëri” pak para mbylljes së ndeshjes. Përjashtim nga bllokimet do të bëjnë Rruga e Elbasanit, Unaza dhe bulevardi “Bajram Curri”, të cilat do të mbeten të hapura për qarkullimin e automjeteve. Përveç masave në trafik, strukturat e rendit do të ushtrojnë kontrolle të rrepta ndaj të gjithë tifozëve në hyrje të stadiumit. Policia kujton se është rreptësisht i ndaluar futja e fishekzjarrëve, flakadanëve, lëndëve piroteknike, banderolave me përmbajtje raciste, çadrave, çakmakëve, karikuesve të telefonave, produkteve kozmetike, monedhave metalike apo çdo sendi tjetër të fortë që mund të rrezikojë sigurinë e pjesëmarrësve. Në këtë kuadër, forcat e rendit u bëjnë thirrje qytetarëve dhe tifozëve që të paraqitja pranë dyerve hyrëse të nisë nga ora 18:30, për të shmangur radhët e gjata dhe rrezikun e humbjes së minutave të para të ndeshjes si pasojë e fluksit të lartë. Për mbarëvajtjen e këtij eventi, qindra efektivë policie janë angazhuar në terren për të ofruar siguri, por edhe ndihmë e informacion për çdo rast nevoje, me qëllim që sfida të mbyllet pa asnjë incident dhe të mbrohet imazhi i vendit.