Kryeqyteti bëhet gati për garën e madhe, Rama thirrje qytetarëve: Vishni atletet më 24-25 tetor

Kryeministri Edi Rama ka ndarë një videomesazh në rrjetet sociale, përmes të cilit u bën thirrje qytetarëve që të bëhen pjesë e aktivitetit të madh të vrapimit që do të organizohet në Tiranë gjatë datave 24 dhe 25 tetor. Kreu i qeverisë i ka inkurajuar të gjithë që të bëhen gati dhe të provojnë kufijtë e tyre përmes kësaj sfide sportive. “Më 24–25 Tetor, rrugët e kryeqytetit kthehen në pistën më të madhe të vrapimit 🇦🇱. Mos e lër për ‘vitin tjetër’. Vish atletet. Sfido veten”, ka shkruar Rama në mesazhin e tij publik. Kjo ngjarje synon të bashkojë në bulevardet dhe rrugët e Tiranës qytetarë të ndryshëm dhe dashamirës të sportit, duke u dhuruar atyre një fundjavë të mbushur me energji, lëvizje dhe aktivitet fizik.