Pas pesë vitesh heshtje në ekran, Fatmira Breçani zbulon prapaskenat e karrierës dhe pengun e madh familjar

Këngëtarja e njohur e muzikës popullore, Fatmira Breçani, është rikthyer në vëmendjen e mediave pas një pauze pesëvjeçare. Ajo ka qenë e ftuar në emisionin “Në Shtëpinë Tonë”, moderuar nga Alban Musa, ku ka bërë një bilanc të 40 viteve të karrierës së saj artistike, duke ndarë me shikuesit detaje nga jeta personale dhe planet e ardhshme. Duke shpjeguar arsyen e kësaj mungese kaq të gjatë televizive, artistja theksoi se preferon të flasë vetëm kur ka diçka konkrete për të thënë. Sipas saj, shfaqjet e shpeshta dhe përsëritja e të njëjtave fjalë vetëm sa i lodhin dhe i mërzitin njerëzit. E pyetur nga moderatori mbi pengjet e mundshme gjatë jetës, Breçani u shpreh se në rrafshin profesional ndihet e përmbushur dhe se i ka shfrytëzuar e vazhdon t'i shfrytëzojë të gjitha mundësitë që i ka dhënë skena. Megjithatë, ajo pranoi se në aspektin familjar ka një dëshirë të parealizuar plotësisht: do të kishte dashur të sillte në jetë edhe dy-tre fëmijë të tjerë. Në lidhje me raportet me kolegët e skenës, këngëtarja tregojë se nuk ka ndjerë kurrë xhelozi të shprehur hapur prej tyre. Përkundrazi, ajo tregoi me humor se gjatë eventeve artistike, kolegët shpesh i lënë radhën duke i thënë se “përtojnë të këndojnë pas saj” dhe e thërrasin me përkëdheli “o Dadë”. Ndërsa për bashkëpunimet e reja, ajo bëri me dije se aktualisht është e fokusuar te krijimet e saj vetjake, por mbetet e hapur për projekte në të ardhmen. Duke iu përgjigjur pyetjes së Alban Musës mbi sekretin e dashurisë së madhe që publiku ka për të, Breçani e lidhi këtë me sinqeritetin e saj si njeri, komunikimin e ngrohtë me fansat dhe natyrisht, zotin që i ka falur një zë të veçantë. Ajo theksoi se është krenare për ëndrrat e fëmijërisë, besimin se do të arrinte diku, por mbi të gjitha për mbështetjen e palëkundur të familjes dhe publikut që e mban në majë. Këngëtarja u tregua veçanërisht e emocionuar kur foli për dashurinë që merr nga brezi i ri, duke e quajtur këtë një lumturi të pafundme që ka thyer barrierat e moshës. Ajo kujtoi me kënaqësi se si këngët e saj u bënë virale në rrjetet e reja dixhitale, përfshirë momentet e famshme në dasmat e vëllezërve të Don Xhonit dhe Butrint Imerit, ku ajo i ngacmoi me humor se e kishin radhën për t'u martuar. Në fund të bisedës, duke prekur jetën familjare, artistja u ndal te roli i gjyshes, duke pohuar se dashuria për nipërit dhe mbesat është diçka e pakrahasueshme. Ajo tregoi me buzëqeshje se është nga ato gjyshe që herë pas herë bëhet e rreptë dhe i qorton, ndonëse fëmijët priren të jenë më të lidhur emocionalisht pas gjyshit dhe dajës.