Ruhet stabiliteti financiar i vendit: Agjencia prestigjioze ruan vlerësimin kreditor të Maqedonisë

Agjencia e njohur ndërkombëtare e vlerësimit të kreditit, "S&P Global Ratings", ka marrë vendimin zyrtar për të konfirmuar notat sovrane të Maqedonisë për afatin e gjatë dhe të shkurtër në "BB-/B", duke ruajtur njëkohësisht perspektivën e qëndrueshme të ekonomisë vendase. Sipas shpjegimeve të dhëna nga agjencia, ky vendim mbështetet në konstatimin se dinamika e favorshme ekonomike, niveli i kontrolluar i borxhit publik dhe shpenzimet e arsyeshme për shërbimin e tij, arrijnë të balancojnë sfidat që vijnë si pasojë e deficiteve të larta në buxhet. Në raportin e publikuar nga "S&P", theksohet se realizimi i nismave të mëdha infrastrukturore dhe kërkesa e lartë e konsumit do të shërbejnë si shtyllë për zgjerimin ekonomik, i cili parashikohet të arrijë rreth 3.6 për qind përgjatë viteve 2026 dhe 2027, pavarësisht sfidave të mundshme që mund të shkaktojë konflikti në Lindjen e Mesme. Gjithashtu, agjencia parashikon se intensifikimi i investimeve publike do të nxisë zhvillimin, por njëkohësisht do të sjellë një rritje të borxhit neto qeveritar me afërsisht 5 për qind të BPV-së pëjatë vitit 2026. Pavarësisht kësaj, parashikimet sugjerojnë se hapesira e deficitit buxhetor do të shënojë rënie graduale në periudhën deri në vitin 2029. Në dokument theksohen edhe skenarët e mundshëm që mund të ndikonin negativisht, duke detyruar një ulje të notës kreditore. Kjo situatë mund të paraqitet nëse treguesit fiskalë apo ata të jashtëm pësojnë rënie drastike, siç mund të jetë tkurrja e rezervave valutore që do të rëndonte stabilitetin e valutës vendase ndaj euros, ose nëse tejkalimet e herëpashershme buxhetore rrisin me ritme të shpejta borxhin. Në krahun e kundërt, një përmirësim i mundshëm i pozicionit kreditor mund të arrihet përmes konsolidimit afatgjatë të institucioneve, konkretizimit të reformave që i japin theks rritjes ekonomike, përparimit konkret drejt integrimit në Bashkimin Evropian, ose uljes afatgjatë të borxhit neto të shtetit përmes një hov Më të fuqishëm ekonomik.