Skandali i Milot-Balldren: Fatura e rrugës 17 kilometrash trefishohet dhe kap shifrën e mbi 364 milionë eurove

Projekti infrastrukturor për ndërtimin e aksit rrugor Milot-Balldren ka pësuar një rritje drastike të kostove dhe afateve kohore, duke u trefishuar krahasuar me parashikimet e vitit 2018 e deri në mbyllje të vitit 2025. Dokumentet e siguruara zbulojnë se kontrata fillestare koncesionare me shoqërinë ANK shpk, bazuar në studimin e fizibilitetit, parashikonte një vlerë prej 161,500,000 eurosh për një periudhë 13-vjeçare. Pas marrjes së drejtimit të Ministrisë së Infrastrukturës dhe Energjisë nga Belinda Balluku dhe tërheqjes së kompanisë fituese në vitin 2018, shpenzimet u rritën ndjeshëm në thirrjen e dytë, duke arritur rreth 365 milionë euro për një kohëzgjatje prej 35 vitesh, për vetëm 17 kilometra rrugë. Megjithatë, procesi konkurrues u anulua në fillim të vitit 2025 me arsyetimin se asnjë nga ofertat e paraqitura nuk plotësonte kriteret e përcaktuara në ftesë. Pas dështimit të kësaj gare, u hap thirrja e tretë ku u regjistruan tri oferta, ndërsa në korrik të vitit 2026 u shpall fitues bashkimi i përkohshëm i shoqërive “Salillari, Alb, Infrakonsult dhe Erald G”, me një diferencë prej mbi 203 milionë eurosh më shumë se kontrata e parë. Hulumtimet e mëparshme kanë treguar se dy nga kompanitë e këtij konsorciumi lidhen me persona që janë nën hetim nga SPAK. Gjatë prezantimit të projektbuxhetit në atë periudhë, vetë ministrja Balluku deklaroi se ndryshimi i skemës së financimit solli domosdoshmërinë e rishikimit të studimit të fizibilitetit për Milot-Balldrenin. Kjo ka ngritur pikëpyetje të shumta mbi mënyrën se si u llogarit kjo faturë e ndryshuar me rritje galopante, mbi çfarë parashikimi të fluksit të automjeteve u mbështet modeli dhe nëse ndryshimet ndikuan te metodat e vlerësimit. “Ngelen gara fiktive, mbeten në letër por nuk zbatohen sipas procedurave të koncensionit. Gjejnë kompani që do ndërtojnë rrugën, lidhin marrëveshje, por këto nuk bëhen në mënyrë transparente por bëhen në takime të fshehta. Përcaktohet kompania që do e marr dhe në bazë të gjithë këtyre përgatitet dokumentacioni, e pas shumës së dakordësuar përgatitet preventivi që ose trefishohet, ose katërfishohet apo pesëfishohet”, shprehet inxhinieri gjeodet, Romeo Nazarko. E gjithë historia e këtij koncesioni nxjerr në pah një qasje ekonomike ku shpenzimet për ndërtimin e 17 km rrugë barazohen pothuajse me kostot e operimit dhe mirëmbajtjes. Projekti ndahet në 182.5 milionë euro për ndërtimin dhe rehabilitimin e aksit, ndërsa vetëm për mirëmbajtjen rutinë dhe operimin shuma arrin në 168.4 milionë euro. Këto shifra tregojnë se Belinda Balluku ka llogaritur shpenzimet e mirëmbajtjes në të njëjtën vlerë që në vitin 2018 përbënte koston totale të koncesionit sipas studimit të fizibilitetit. Këto të dhëna kërkojnë transparencë të plotë se si u përcaktuan kriteret dhe kush qëndron pas krijimit të kësaj fature me kosto të fryra. Statistikat e Projektit të Rrugës Milot-Balldren: Koncesion/PPP 2018: 161,500,000 Euro / Kohëzgjatja: 13 vite Koncesion/PPP 2025: 364,732,924 Euro / Kohëzgjatja: 35 vite