Situatë alarmante në Likovë: Zjarret vazhdojnë të përhapen në terrenin e vështirë malor

Flakët mbeten aktive edhe gjatë ditës së sotme në fshatrat Matejçe dhe Strima të Komunës së Likovës, ku vatrat po shtrihen në zona malore që paraqesin vështirësi ekstreme për qasje, konfirmojnë të dhënat nga Qendra Rajonale për Menaxhimin e Krizave (QRMK) e Kumanovës. Në fshatin Matejçe, vatra e zjarrit vijon të jetë aktive përgjatë aksit rrugor që të çon drejt manastirit. Edhe pse tri ekipe nga njësia rajonale e ndërmarrjes publike "Pyjet Kombëtare" u angazhuan menjëherë në terren, konfigurimi i vështirë i tokës e bëri të pamundur shuarjen e plotë të flakëve, duke detyruar ekipet që të tërhiqen. Ndërkohë, një vatër tjetër aktive regjistrohet në fshatin Strima. Banorët lokalë kanë ndërhyrë me sukses duke vënë nën kontroll rrezikun që i kanosej zonës së banuar pranë shtëpive, mirëpo flakët vazhdojnë të përparojnë në pjesët e larta malore, konkretisht në lokalitetin "Crven Kamen". Në bazë të të dhënave nga "Pyjet Kombëtare", të përcjella përmes QRMK-së së Kumanovës, autoritetet vlerësojnë se ndërhyrja nga ajri përmes avionëve është tashmë e domosdoshme për vënien nën kontroll të situatës. Për ngjarjen janë njoftuar zyrtarisht Njësia Territoriale e Zjarrfikësve në Kumanovë, Inspektorati Shtetëror Pyjor, Ndërmarrja e Pylltarisë, si dhe autoritetet e Komunës së Likovës.