Rrëfimi rrëqethës i nënës në Korçë: Fëmija u zverdh në të aguar, alarmi për helmimin në kopsht u dha në WhatsApp

Një nga nënat e fëmijëve të mitur që u prekën nga ngjarja e rëndë e helmimit në një kopsht në qytetin e Korçës, ka ndarë detaje tronditëse rreth përvojës së saj, gjatë një lidhjeje direkte në emisionin “Review” me moderatoren Greta Topjana. Ajo tregoi se shenjat e para të shqetësimit te i biri u shfaqën pasi e kishte kthyer tashmë në shtëpi. Sipas dëshmisë së saj, situata mori një kthesë tjetër kur ajo komunikoi me prindërit e tjerë përmes një grupi në aplikacionin WhatsApp. Aty kuptoi se nuk bëhej fjalë vetëm për djalin e saj, por se edhe fëmijë të tjerë të kopshtit po vuanin nga të njëjtat simptoma, ndërsa disa prej tyre ishin dërguar urgjentisht në spital për shkak të gjendjes më të rëndë shëndetësore. Për fat të mirë, djali i saj e kaloi situatën kryesisht me të vjella dhe pa komplikime më serioze. “Fatmirësisht gjendja e tij është shumë mirë. Nuk është se ka pasur ndonjë problem shumë të madh, por shqetësime të vogla. Ne e kemi marrë nga kopshti siç e marrim zakonisht në orën 1:30, e mori bashkëshorti im. Djali ishte shumë mirë. Nuk është se kishte ndonjë shqetësim apo të dukej që kishte diçka. Pasi vjen në shtëpi pati një ankesë se kishte dhimbje barku, por e pashë që e kaloi dhe nuk u shqetësova,” u shpreh ajo gjatë bisedës televizive. Më tej, ajo sqaroi se e kishte nisur të birin në stërvitje rreth orës 17:30, shoqëruar me shokët e tij të grupit nga kopshti, moment ky kur paniku nisi të përhapet mes familjarëve. “Në stërvitje e çoj bashkë me shokët që ai ka te grupi i kopshtit dhe shikoj që shumë prindër po shkruanin te grupi se i kishin fëmijët me të vjella e dhimbje barku, dhe aty u shqetësova,” shtoi ajo. Duke vijuar rrëfimin, nëna tregoi se kontaktoi edhe me mikeshat e saj, fëmijët e të cilave ndiqnin të njëjtin institucion parashkollor, për të kuptuar dimensionin e vërtetë të situatës. “Më thanë që i kishin çuar në urgjencë sepse fëmijët ishin goxha rëndë,” tha ajo, duke shtuar se vendosi ta tërhiqte të birin nga stërvitja para kohës për ta mbajtur nën vëzhgim të rreptë. Në lidhje me orët e fundit të kaluara nën ankth, ajo përfundoi: “Aty u shqetësova, shkoj në stërvitje. E marr nga stërvitja para se të mbaronte dhe po e vëzhgoja gjatë gjithë ditës. Nuk pati ndonjë problem. Vetëm në orën 4 të mëngjesit pati një të vjellë dhe gjatë ditës së shtunë ishte pak i lodhur, i zverdhur në fytyrë. Vetëm këto simptoma kishte fëmija im.”