Krizë strehimi në Spanjë: Dhjetëra mijëra qytetarë pushtojnë rrugët e Madridit pas bllokimit të ligjeve nga opozita

Valë pakënaqësie dhe protesta masive kanë përfshirë Madridin dhe dhjetëra qytete të tjera spanjolle, ku mijëra qytetarë i janë përgjigjur thirrjes për një "grevë të përgjithshme" në mbrojtje të strehimit të përballueshëm. Tubimet u shoqëruan me zhurmën e tenxhereve, tiganëve, fishkëllimave dhe çelësave, të cilat u bënë simbol i revoltës qytetare. Kjo valë protestash erdhi si reagim i menjëhershëm ndaj vendimit të Kongresit të Deputetëve për të rrëzuar dy dekrete kyçe qeveritare, të mbështetura nga kryeministri Pedro Sánchez, të cilat kishin për qëllim frenimin e krizës së rëndë të banimit. Projektligjet qeveritare u kundërshtuan dhe u rrëzuan nga një front i përbashkët parlamentar i krahut të djathtë, ku bëjnë pjesë Partia Popullore, Vox, si dhe forca katalanase Junts per Catalunya. Në rrugët e kryeqytetit, turmat e marshuesve lëshuan thirrje të forta duke brohoritur "Turp!" dhe duke kërkuar largimin e spekulatorëve nga zonat e tyre rezidenciale. Të dhënat mbi pjesëmarrjen ndryshojnë; autoritetet policore të Madridit raportuan rreth 70 mijë protestues, ndërsa Sindikata e Qiramarrësve llogariti se numri i pjesëmarrësve i kaloi gjysmë milioni. Organizimi parashikonte nisjen e kolonave të manifestuesve nga katër drejtime të ndryshme të kryeqytetit, të cilat më pas u bashkuan në një marshim të vetëm në Plaza Cibeles. Protestës iu bashkuan gjithashtu edhe përfaqësues dhe aktivistë të lëvizjes “Indignados”, të cilët kanë ngritur një kamp proteste në sheshin Puerta del Sol në zemër të Madridit prej rreth një jave, duke sfiduar edhe kushtet e vështira atmosferike dhe reshjet e dendura të shiut.