Eksperti i sigurisë: Beogradi po lëshon propagandë për të manipuluar të vërtetën mbi ngjarjen e Banjskës

Në kuadër të shënimit të përvjetorit të sulmit në Banjskë, njohësi i çështjeve të sigurisë, Avni Islami, ka dalë me një reagim të ashpër ndaj deklaratave të zyrtarit të lartë serb, Petar Petkoviq, i cili drejton të ashtuquajturën Zyrë për Kosovën në Qeverinë e Serbisë. Përmes një analize të publikuar në rrjetet sociale, Islami ka vlerësuar se fjalët e Petkoviqit dëshmojnë një strategji të qartë të Beogradit për të tjetërsuar të vërtetën e ngjarjes, duke përdorur mjete të dezinformimit dhe propagandës për të manipuluar opinionin publik. Sipas tij, orvatja e autoriteteve serbe për të zhvendosur vëmendjen te mënyra e vdekjes së tre anëtarëve të grupit të armatosur bëhet vetëm e vetëm për të fshehur fajësinë reale dhe përgjegjësinë direkte në organizimin, financimin dhe pajisjen me armatim të këtij formacioni paramilitar. Islami ka analizuar gjithashtu pretendimet e Petkoviqit rreth kinse "ekzekutimeve të të burgosurve" dhe mungesës së transparencës, duke i cilësuar ato si pjesë të një lufte hibride që synon të paraqitë agresorin si viktimë dhe të dëmtojë imazhin e institucioneve vendase e ndërkombëtare të sigurisë. Në fund, eksperti i sigurisë ka nënvizuar se hedhja e dyshimeve mbi punën e EULEX-it apo ekspertëve mjeko-ligjorë shpërfaq qartë se Serbia nuk synon zbardhjen e drejtësisë, por po përpiqet të ndërtojë një narrativë të rreme për të mbrojtur strukturat kriminale që rrezikojnë paqen dhe stabilitetin rajonal.