Smajl Latifi: Rahoveci bëhet bashkë me protestën e OVL-UÇK-së për mbrojtjen e vlerave të luftës

Kryetari i Komunës së Rahovecit, Smajl Latifi, ka bërë të ditur se banorët e kësaj ane i janë përgjigjur thirrjes për protestë nga Organizata e Veteranëve të Luftës së Ushtrisë Çlirimtare të Kosovës (OVL-UÇK). Ky tubim është organizuar për të mbështetur luftën e drejtë çlirimtare dhe për të përkujtuar kontributin dhe sakrificën e gjeneratave të kaluara për lirinë e vendit. Latifi ka bërë të me dije se nga kjo komunë është dërguar qartë motoja “Jo në emrin tim!”, shoqëruar me kërkesën e prerë për liri për ish-pjesëtarët e UÇK-së që ndodhen në paraburgim apo përballen me procese gjyqësore. “Sot, Rahoveci iu bashkua protestës së OVL-UÇK-së, në mbrojtje të së vërtetës së luftës çlirimtare dhe në nderim të sakrificës së brezave që i dolën zot Kosovës”, ka shkruar ndër të tjera kryetari Latifi në rrjetet sociale. Duke e vënë theksin te e kaluara historike e kësaj zone, ai e ka quajtur Rahovecin si tokë të përleshjeve të lavdishme, qëndresës së palëkundur dhe mundit të madh. “Nga Rahoveci, qyteti i betejave, i qëndresës dhe i sakrificës, u përcoll një zë i vetëm: JO NË EMRIN TIM! LIRI PËR ÇLIRIMTARËT!”, ka shtuar më tej ai gjatë deklarimit të tij. Në mbyllje të reagimit zyrtar, i pari i Rahovecit ka përkujtuar se ky organizim ka për qëllim ruajtjen e kujtesës kolektive për çmimin e lartë që u pagua për shtetin e Kosovës. “Për lirinë që u fitua me gjak, për të vërtetën që nuk shuhet dhe për Kosovën që e deshëm të lirë”, ka përfunduar shkrimin e tij Smajl Latifi.