Kombëtarja U-17 lëshon fitoren nga duart në sekondat e fundit ndaj Malit të Zi

Kombëtarja e Shqipërisë U-17 ka nisur serinë e ndeshjeve miqësore me një barazim 2-2 ndaj bashkëmoshatarëve të Malit të Zi. Përfaqësuesja kuqezi, e vënë nën drejtimin e trajnerit Armand Dama, la shije mjaft pozitive gjatë 45 minutave të para, periudhë në të cilën realizoi dy herë. Zhvillimi i takimit foli fillimisht për talentët shqiptarë, të cilët zhbllokuan shifrat që në minutën e 18-të. Pas një harkimi të rrezikshëm nga krahu i djathtë i sulmit nga Hyseni, mbrojtësi kundërshtar Ivanoviç gaboi, duke e dërguar topin në portën e tij dhe duke i dhënë avantazhin Shqipërisë. Dominimi i kuqezinjve u konkretizua sërish para se të plotësohej gjysmë ore lojë. Këtë herë ishte protagonist vetë Hyseni, i cili finalizoi me sukses një aksion të bukur, duke dyfishuar shifrat dhe duke e çuar rezultatin në 2-0 për Shqipërinë. Fraksioni i dytë solli një reagim nga malazezët, të cilët arritën të ngushtonin epërsinë në minutën e 62-të. Situata për kuqezinjtë u vështirësua ndjeshëm në minutën e 83-të, kur Sharka u ndëshkua me karton të kuq, duke e lënë skuadrën me dhjetë lojtarë deri në përfundim të takimit. Kur triumfi dukej se ishte siguruar, Mali i Zi përfitoj nga epërsia numerike dhe barazoi shifrat në minutat shtesë me anë të Bulatoviç, duke vulosur barazimin përfundimtar 2-2. Testi i dytë miqësor mes dy përfaqësueseve është planifikuar të zhvillohet të hënën, duke filluar nga ora 11:00, në ambientet e stadiumit “Loro Boriçi” në qytetin e Shkodrës. Tifozët dhe dashamirësit e futbollit do kenë mundësinë ta ndjekin këtë përballje përmes transmetimit direkt në platformën FSHF TV, si dhe në kanalin zyrtar të Federatës Shqiptare të Futbollit në YouTube.