Drenasi ngrihet në protestë: Familjet e viktimave dhe qytetarët kërkojnë drejtësi për krerët e UÇK-së

Në Drenas është mbajtur një protestë masive si shenjë kundërshtimi ndaj vendimeve të Gjykatës Speciale në Hagë ndaj ish-drejtuesve të Ushtrisë Çlirimtare të Kosovës: Hashim Thaçit, Kadri Veselit, Jakup Krasniqit dhe Rexhep Selimit. Organizatat e dala nga lufta, të mbështetura nga qytetarë dhe familjarë të viktimave, kanë kërkuar mbrojtjen e vërtetësisë së luftës së pastër të UÇK-së, duke përsëritur thirrjen unifikuese “Jo në emrin tim!”. Kryetari i degës së organizatave të dala nga lufta në Drenas, Enver Hajdari, ka shprehur qëndrimin e prerë se dënimet e shqiptuara nga Haga nuk përbëjnë të vërtetën përfundimtare të historisë. Sipas tij, procesi gjyqësor është i bazuar në prova të pabazuara, duke shprehur shqetësimin e thellë për mënyrën se si po tentohet të shtrembërohet lufta çlirimtare e popullit tonë. Në këtë tubim ka marrë pjesë edhe kryetari i Komunës së Drenasit, Ramiz Lladrovci, i cili kërkoi që mbështetja për ish-udhëheqësit e UÇK-së të shfaqet në mënyrë dinjitoze dhe demokratike. Duke kujtuar masakrat dhe varrezat masive në këtë rajon, Lladrovci nënvizoi se qytetarët e Drenasit, më shumë se kushdo tjetër, e njohin peshën e gjenocidit serb dhe sakrificën e bërë për lirinë e vendit. Altin Krasniqi, djali i Jakup Krasniqit, u ka bërë thirrje forcave politike shqiptare që të lënë mënjanë ndasitë dhe të bashkohen për të mbrojtur trashëgiminë e UÇK-së. Ai theksoi se beteja për drejtësi është një çështje kombëtare që tejkalon çdo individ apo parti politike, duke shtuar se mbrojtja e luftës së drejtë është një obligim për të ardhmen e shtetit dhe kujtesën kolektive. Zëri i familjeve që pësuan më së rëndi gjatë luftës, siç janë familjet Deliu dhe Muqolli, ishte po ashtu i pranishëm në këtë tubim. Imer Deliu, në emër të këtyre familjeve, ka kundërshtuar ashpër vendimet e Speciales, duke konsideruar se ato nuk janë vetëm goditje ndaj ish-drejtuesve të UÇK-së, por një përpjekje për të njollosur gjakun e derdhur për lirinë e Kosovës.