Spektakël dhe gol historik: Modesta Uka shkëlqen në derbin e Vjenës

Derbi i parë i Vjenës në futbollin e femrave është mbyllur me një triumf spektakolar dhe të thellë të Austria e Vjenës, e cila ka mposhtur Rapidin me rezultatin e pastër 6:0, në një takim të jashtëzakonshëm të ndjekur nga një audiencë rekord tifozësh. Futbollistja e talentuar nga Kosova, Modesta Uka, e nisi ndeshjen nga minuta e parë si titullare për fanellën e Austrisë, duke kontribuar në këtë fitore historike para se të zëvendësohej në startin e pjesës së dytë, në minutën e 46-të. Ndeshja mblodhi në shkallët e stadiumit saktësisht 2.359 spektatorë, shifër kjo që përbën një rekord absolut për një ndeshje të vlefshme për Bundesliga austriake në konkurrencën e femrave. Goli i parë i duelit erdhi pasi një top i gjatë u drejtua te Patricia Pfanner, ndërsa mbrojtja e Rapidit dështoi të largonte rrezikun nga zona e rrezikut. Elisa Pfattner përfitoi nga situata dhe me një gjuajtje precize zhbllokoi shifrat duke i dhënë avantazhin 1:0 skuadrës vendase. Pavarësisht përpjekjeve për të reaguar, skuadra e Rapidit nuk arriti të krijojë rreziqe konkrete para portës së Austrisë, duke vuajtur dominimin e kundërshtareve në fushë. Pas rreth gjysmë ore lojë, Austria e Vjenës dyfishoi epërsinë. Louise Schoffel depërtoi bukur nga krahu i djathtë dhe dërgoi një krosim të fuqishëm në zonë, ku Modesta Uka u gjend në vendin e duhur për ta shtyrë topin në rrjetë, duke ngritur shifrat në 2:0. Forma e mirë e vendaseve u kurorëzua edhe me golin e tretë në minutën e 35-të, kur pas një harkimi nga goditja e lirë, topi u devijua nga Leidler dhe përfundoi fatkeqësisht në portën e Rapidit. Me të filluar pjesa e dytë, gjërat u komplikuan edhe më shumë për mysafiret. Kapitenia Sandrina Haupt u ndëshkua me kartonin e dytë të verdhë për një ndërhyrje të gabuar, duke lënë skuadrën e saj me një lojtare më pak në fushë pas daljes me të kuq. Dominimi i Austrisë vazhdoi edhe në fraksionin e dytë. Në minutën e 70-të, Schiffel dhuroi sërish një asistim perfekt nga krahu, ndërsa Sandra Jakobsen shënoi për rezultatin 4:0. Vetëm tre minuta më vonë u regjistrua edhe perla e ndeshjes, kur Sisic ekzekutoi në mënyrë mjeshtërore një goditje dënimi, duke e dërguar topin në rrjetë dhe rezultatin në 5:0. Për të vulosur këtë fitore historike u kujdes Patricia Pfanner, e cila në minutën e 85-të realizoi golin e gjashtë, duke mbyllur përfundimisht llogaritë e këtij derbi. Pas përfundimit të javës së tetë në kampionat, Austria renditet në pozicionin e tretë me 22 pikë të tubuara, vetëm tri më pak se liderja St. Polten, ndërkohë që Rapidi pozicionohet i teti me 6 pikë në renditje.