Kriza e thellë në kombëtare, Musliu pas disfatës nga Skocia: Nuk është shaka, duhet ndryshime rrënjësore

Kriza e rezultateve për Maqedoninë e Veriut vijon të thellohet, pasi skuadra on pësuar një tjetër humbje, kësaj radhe me rezultatin 0:2 përballë Skocisë, në kuadër të xhiros së tretë të Ligës së Kombeve. Një nga statistikat më alarmante të kësaj periudhe është se ekipi kombëtar ka arritur në kuotën e 697 minutave pa realizuar asnjë gol, duke shënuar kështu serinë më të gjatë pa gjetur rrjetën në historinë e saj. Goli i fundit i realizuar nga përfaqësuesja e Maqedonisë së Veriut mban datën e nëntorit të vitit të kaluar, kur sulmuesi Bojan Miovski pati tundur portën kundërshtare. Pas përfundimit të ndeshjes dhe humbjes së radhës ndaj skocezëve, mbrojtësi shtatlartë Visar Musliu ka lëshuar një reagim të ashpër, duke kërkuar ndryshime urgjente në skuadër. “Duhet të ndryshojmë shumë gjëra, sepse kështu nuk shkon më. Unë gjithmonë nis nga vetja. Duhet ta analizojmë veten si ekip dhe si individë, në mënyrë që të arrijmë rezultate më të mira, sepse në kombëtare rezultati është gjithmonë i rëndësishëm”, u shpreh Musliu. Mbrojtësi vuri theksin edhe te nevoja e një mentaliteti të ri në fushë, duke kërkuar reflektim nga gjithë grupi: “Duhet ta ndryshojmë pak qasjen. Kombëtarja nuk është shaka. Ky është niveli më i lartë i futbollit evropian. Duhet të jemi të vetëdijshëm se luajmë në Ligën B, ku ka kombëtare serioze dhe lojtarë me shumë cilësi”. Në fjalën e tij, ai pranoi hapur se paraqitjet e fundit në fushën e blertë kanë lënë për të dëshiruar dhe nuk i përgjigjen pritshmërive: “Ajo që po japim në fushë në ndeshjet e fundit dukshëm nuk është e mjaftueshme, duke filluar nga unë dhe pastaj te të gjithë lojtarët e tjerë”. Vlen të theksohet se triumfi i Skocisë me shifrat 2:0 u vulos falë golave të realizuar nga Kieron Boëie dhe John McGinn, të cilët shfrytëzuan gabimet e mbrojtjes vendase.