“Unë di më shumë për çdo gjë”: Fjalimi i fortë i Donald Trump para zgjedhjeve në SHBA

Gjatë një tubimi elektoral në Ohio, presidenti amerikan Donald Trump ka mbajtur një fjalim të zjarrtë ku ka mbrojtur arritjet e administratës së tij, ka shfaqur vetëbesim të lartë në aftësitë e tij udhëheqëse dhe ka lansuar premtime të reja për qytetarët në kuadër të fushatës për zgjedhjet e mesmandatit. Duke folur para mbështetësve, kreu i Shtëpisë së Bardhë e cilësuar veten si një njeri me “inteligjencë shumë të lartë”, duke pretenduar se zotëron një nga koeficientët e inteligjencës (IQ) më të lartë në glob. Më tej, ai shtoi se njohuritë e jo vetëm për çështjen e inflacionit, por “për gjithçka”, i kalojnë ato të çdo personi të pranishëm në sallë dhe praktikisht të kujtdo tjetër në botë. Trump gjithashtu u shpreh se SHBA-ja po regjistron kaq shumë suksese saqë ai vetë nuk po mundet t'i bëjë ballë më kësaj vale fitoresh. “Po fitojmë në mënyrë të jashtëzakonshme”, theksoi ai gjatë mitingut. Një nga pikat kyçe të fjalimit ishte premtimi se çdo qytetar i rritur amerikan do të përfitojë një çek prej 5 mijë dollarësh, nëse Partia Republikane arrin të sigurojë kontrollin e Dhomës së Përfaqësuesve dhe Senatit në zgjedhjet e 3 nëntorit. Sipas tij, kjo mbështetje financiare do të financohet nga të ardhurat që administrata po siguron përmes tarifave doganore. Në të njëjtën kohë, ai paralajmëroi se një triumf i mundshëm i demokratëve do ta zhyste vendin në një krizë të rëndë ekonomike, të ngjashme me Depresionin e Madh të vitit 1929. Ky premtim financiar prej 5 mijë dollarësh është përsëritur disa herë nga kreu i shtetit gjatë kësaj fushate zgjedhore. Presidenti njoftoi gjithashtu synimin e tij për të iniciuar ndryshime ligjore që do të sillnin rivendosjen e dënimit me vdekje për trafikantët e mëdhenj të substancave narkotike, kontrabandistët e qenieve njerëzore, si dhe për autorët e vrasjeve të punonjësve të policisë. Në fushën e sigurisë kombëtare dhe menaxhimit të kufijve, ai bëri të ditur se ekipi i tij po përgatit masa shtesë, duke përfshirë akte legjislative që synojnë t'i heqin presidentëve të ardhshëm mundësinë e hapjes së kufijve ndaj migracionit të paligjshëm. Përqendrimi kryesor i këtij tubimi ishte mobilizimi i elektoratit republikan për të siguruar fitoren në Kongres më 3 nëntor, datë kjo ku vendoset balanca e pushtetit legjislativ në Uashington. Trump argumentoi se një Kongres i dominuar nga republikanët do t'i jepte hov zbatimit të axhendës së tij ekonomike dhe të sigurisë. Gjatë fjalës së tij, ai nuk i kurseu as sulmet e ashpra ndaj kundërshtarëve politikë, duke i akuzuar demokratët se do të shkatërronin ekonominë kombëtare nëse rikthehen në pushtet. Po ashtu, ai hodhi poshtë sondazhet e fundit që tregojnë mbështetje të ulët për punën e tij, duke i cilësuar ato si të pavërteta. Këto zhvillime dëshmojnë se faza përmbyllëse e fushatës së Trump po mbështetet fort te mesazhet e qarta për ekonominë dhe sigurinë, duke u bërë thirrje qytetarëve që të votojnë masivisht kandidatët republikanë në të dy dhomat e Kongresit.