Kriza e rezultateve sjell ndryshimin në stol, Alban Dragusha largohet nga drejtimi i FC Ferizajt

Ecuria negative në këtë fillimsezoni në Ligën e Parë të Kosovës në futboll ka sjellë largimin e trajnerit Alban Dragusha ngankryesimi i shtabit teknik të FC Ferizajt. Kjo lëvizje vjen pas një nisjeje të zbehtë të garave, ku pas tetë javëve të zhvilluara, skuadra ferizajase pozicionohet në vendin e nëntë të renditjes tabelore, me vetëm 10 pikë në llogarinë e saj. Si pasojë e këtyre rezultateve zhgënjyese, drejtuesit e klubit dhe tashmë ish-trajneri kanë vendosur që rrugët e tyre të ndahen. Lajmi është zyrtarizuar nga vetë klubi përmes një njoftimi drejtuar opinionit publik dhe tifozëve, ku sqarohet se vendimi është marrë pas një dakordësie të përbashkët mes palëve. “FC Ferizaj njofton se ka përfunduar bashkëpunimin me trajnerin Alban Dragusha. Pas një mirëkuptimi të ndërsjellë, palët kanë vendosur që bashkëpunimi të përfundojë në këtë fazë”, thuhet në njoftimin zyrtar të klubit. Po ashtu, drejtuesit ferizajas kanë shprehur mirënjohjen e tyre për kontributin e dhënë gjatë kësaj periudhe: “Klubi e falënderon trajnerin Dragusha për punën, përkushtimin dhe profesionalizmin e treguar gjatë periudhës së tij në klub. I urojmë shumë suksese në vazhdim të karrierës dhe e sigurojmë se do të ketë gjithmonë respektin e FC Ferizajt. Faleminderit, Alban!”