Flakë në Malin Sharr: Zjarr mbi Liqenin e Bogovinës, autoritetet japin detajet e para

Një vatër zjarri është aktivizuar ditën e sotme në zonën malore mbi Liqenin e Bogovinës, në territorin e Malit Sharr. Pavarësisht përhapjes së flakëve, autoritetet kompetente bëjnë me dije se situata është nën kontroll dhe nuk ka rrezik për pasuritë pyjore të rajonit. Sipas të dhënave nga Qendra Rajonale për Menaxhimin e Krizave në Tetovë, alarmi është dhënë rreth orës 11:54 nga Njësia Territoriale e Zjarrfikësve të Tetovës, e cila ka njoftuar për shfaqjen e flakëve në këtë zonë të lartë malore. Pas marrjes së njoftimit zyrtar, QRMK-ja e Tetovës ka vënë menjëherë në alarm Ndërmarrjen Publike “Parku Kombëtar Mali Sharr” për të ndjekur situatën në terren. Nga kjo ndërmarrje konfirmuan se janë në dijeni të ngjarjes, duke saktësuar se zjarri ka përfshirë kryesisht kullota dhe shtrihet në një reliev tejet të vështirë për t'u qasur, konkretisht në zonën kufitare mes Maqedonisë së Veriut dhe Kosovës. Në vijim të njoftimit, nga Parku Kombëtar bënë të ditur se situata do të mbahet nën vëzhgim të vazhdueshëm, por për shkak të pamundësisë fizike për të ndërhyrë në atë terren të paarritshëm, nuk do të ketë aksion fizik për shuarjen e tyre, duke ritheksuar se flakët nuk përbëjnë ndonjë kërcënim serioz për pyjet.