Operacioni “Çiklisti” në Krujë: Arrestohet shtetasi polak që terrorizoi hotelet dhe localet

Uniformat blu të Krujës kanë finalizuar me sukses operacionin e koduar “Çiklisti”, duke prangosur një shtetas të huaj i cili dyshohet si autor i disa vjedhjeve të regjistruara në zonë gjatë shtatë ditëve të fundit. Në pranga ka rënë 27-vjeçari me iniciale T. F., me banim në Angli dhe shtetësi polake. Arrestimi i tij erdhi pas kallëzimeve të adresuara në komisariat nga pronarë biznesesh, të cilët kishin rënë pre e vjedhjeve të pronës së tyre. Sipas hetimeve paraprake, i riu shfrytëzante një biçikletë për t'u zhvendosur lehtësisht nëpër qytet. Gjatë javës së fundit, ai dyshohet se ka hyrë në mënyrë të paligjshme në tre hotele dhe lokale të ndryshme në Krujë, prej nga ka mundur të sigurojë shuma monetare, një pajisje celulare dhe sende me vlerë. Gjatë kontrollit fizik dhe atij të ushtruar në ambientet e përdorura prej tij, shërbimet e policisë kanë sekuestruar në cilësinë e provës materiale celularin e grabitur, një sasi parash, si dhe biçikletën që shërbente si mjet transporti gjatë kryerjes së krimeve. Grupi hetimor po vijon intensivisht punën për të verifikuar nëse 27-vjeçari është i përfshirë në ngjarje të tjera të ngjashme kriminale në këtë qytet apo më gjerë. Ndërkohë, materialet procedurale i kanë kaluar Prokurorisë për veprime të mëtejshme ligjore, mbi akuzën e veprës penale të “Vjedhjes”.