Historia e jashtëzakonshme: 78-vjeçari që mban rekordin botëror si arbitri më jetëgjatë në futboll

Në moshën 78-vjeçare dhe pas një rrugëtimi prej 63 sezonesh rresht në fushat e blerta, uellsiani Ken Wright mban zyrtarisht titullin e gjyqtarit aktiv të futbollit për meshkuj me karrierën më të gjatë në shkallë globale, duke numëruar mbi 5 000 ndeshje të drejtuara që prej vitit 1964. Fillimet e tij në këtë profesion erdhën në mënyrë krejtësisht të papritur kur ishte vetëm 16 vjeç, pasi mësuesi i tij i edukimit fizik i dorëzoi një bilbil për të ndarë drejtësinë në një sfidë shkollore. Duke vënë re aftësitë e tij të pakta në kontrollin e topit, arsimtari i pati dhënë një këshillë direkte: “Wrighty, nuk bën për futbollist. Nuk do t’ia dalësh kurrë mbanë. Pse nuk provon të arbitrosh?” Ndeshja e tij e parë zyrtare në “Swansea Senior League” u shndërrua në një përvojë tejet të vështirë, e shoqëruar me reshje të dendura shiu, mot të ftohtë dhe kontestime të shumta nga futbollistët, ku sfida u mbyll me shifrat e thella 13–4. Një nisje e tillë e bëri atë të mendonte dorëheqjen e menjëhershme: “U ktheva në shtëpi krejtësisht i lagur dhe thashë: ‘Epo, karriera ime si arbitër mori fund.’” Pavarësisht këtij starti zhgënjyes, pasioni për gjykimin e mbajti atë të lidhur ngushtë me fushën, duke arritur të drejtojë deri në shtatë takime brenda gjashtë ditësh. Sot, më shumë se gjashtë dekada më vonë, ai vijon të vendosë rregull në ndeshje, pa shprehur asnjë dëshirë apo plan për t'i dhënë fund karrierës së tij të suksesshme.