Pse Kim Kardashian qëndroi pesë vite vetëm para se t'i jepte një shans dashurisë së re

Ylli i njohur botëror, Kim Kardashian, ka zbuluar arsyet e vërteta pse iu desh një periudhë e gjatë pauze nga romancat, përpara se të lidhej me pilotin e njohur të Formula 1, Lewis Hamilton. Gjatë një rrëfimi të sinqertë për gazetën prestigjioze britanike The Times, 45-vjeçarja u shpreh se pas ndarjeve të kaluara nuk ka ndier kurrfarë nxitimi për të hyrë në një tjetër marrëdhënie, pasi kishte nevojë urgjente t'i përkushtohej vetes dhe jetës së saj private. “Kam qenë vërtet vetëm për pesë vjet dhe ishte një ndjenjë e mrekullueshme. Mund të përqendrohesha te fëmijët e mi dhe te projektet në të cilat vërtet dëshiroja të përfshihesha. Nuk kam ndier aspak nevojë për t’u nxituar”, u shpreh ajo. Më tej, themeluesja e markave të suksesshme shtoi se gjatë këtyre viteve nuk ka ndier asnjë lloj boshllëku apo mungese në përditshmërinë e saj. “Nuk ndihesha bosh. Ndihesha sikur kisha nevojë për kohë për veten. Doja të rikuperohesha plotësisht dhe thjesht të punoja me veten. Nuk isha gati të hapesha”, sqaroi ajo gjatë intervistës. Sipas saj, në atë kohë ideja e një lidhjeje romantike ishte larg prioriteteve të saj, ndërsa theksoi se “Universi punon në favorin tuaj kur thjesht e lejoni të ndodhë”. Kujtojmë se pas divorcit bujshëm nga reperi Kanye West, Kardashian pati një histori dashurie nëntëmujore me komedianin dhe aktorin Pete Davidson, e cila i dha fund në vitin 2022. Që prej atij momenti, ajo nuk kishte zyrtarizuar asnjë lidhje tjetër deri në nisjen e romancës aktuale me Lewis Hamilton. Zërat për një lidhje të mundshme mes dyshes nisën qysh në muajt e parë të këtij viti, ndërsa në qershor ajo konfirmoi gjithçka duke shpërndarë në llogarinë e saj në Instagram momente dhe pamje të përbashkëta me yllin britanik të pistave. Pavarësisht kësaj, kur u pyet për detaje më të hollësishme rreth marrëdhënies së tyre aktuale, Kardashian preferoi të ruajë privatësinë, duke u përgjigjur shkurt: “Me gjithë respektin, ndoshta do të preferoja të mos e bëja”.