Kriza e lidershipit në PDK, analisti Sadiku analizon takimin Kurti-Hamza

Pas takimit të zhvilluar mes kryeministrit Albin Kurti dhe kreut të Partisë Demokratike të Kosovës, Bedri Hamza, ka reaguar analisti politik Arbnor Sadiku, i cili ka vënë në pikëpyetje drejtimin dhe qasjen e kësaj force politike. Sadiku ka shprehur kritika të hapura ndaj PDK-së, duke theksuar se partia më e madhe opozitare nuk po vuan vetëm nga mungesa e një komunikimi efektiv, por është përfshirë nga një krizë e thellë e udhëheqjes dhe e figurës kryesore. "Sonte nuk e kuptova fort çka deshti me thanë Hamza i PDK-së, po një gjë po bëhet gjithnjë e më e qartë: PDK-ja nuk e ka veç krizën e mesazhit, e ka krizën e liderit dhe të lidershipit", ka shkruar ai ndër të tjera. Duke analizuar situatën aktuale të kësaj partie, analisti shtoi se kur një subjekt politik humbet orientimin e tij, rrënja e problemit nuk qëndron te mënyra e komunikimit, por te drejtimi dhe kreu i saj. Në përfumim të vlerësimit të tij, Sadiku theksoi se Partisë Demokratike të Kosovës i nevojitet më pak zhurmë politike dhe shumë më tepër vizion e udhëheqje e mirëfilltë.