Zhegrova zbardh arsyet e qëndrimit në Torino: Synoj suksese të mëdha me fanellën bardhezi

Edon Zhegrova ka thyer heshtjen rreth vendimit të tij për të vijuar karrierën te Juventusi, duke i dhënë fund aludimeve të shumta gjatë merkatos verore për një largim të mundshëm nga qyteti piemontez. Anësori nga Kosova ka bërë të ditur se aspirata e tij kryesore ka qenë vazhdimësia e rrugëtimit te një prej skuadrave më prestigjioze në gadishullin Apenin, me synimin e qartë për të lënë gjurmë të pashlyeshme. "Qëndrova sepse e dua këtë klub dhe dua të arrij diçka të madhe", ka deklaruar Zhegrova. Lojtari ka pranuar se kalimi te Juventusi përbën një stacion thelbësor në karrierën e tij sportive, ndaj nuk ishte i gatshëm të largohej pa dëshmuar plotësisht potencialin e tij të vërtetë. "Është privilegj për mua të jem pjesë e kësaj skuadre. Jam shumë i lumtur me shokët, trajnerin, stafin dhe gjithë klubin. Do të jap më të mirën sa herë që të më jepet mundësia të luaj", ka theksuar reprezentuesi kosovar. Në lidhje me vendimin e trajnerit Luciano Spalletti për ta lënë jashtë listës së skuadrës për kompeticionin e Europa League, Zhegrova ka shfaqur maturi duke treguar respekt institucional ndaj zgjedhjeve të stafit teknik. "Është zgjedhje e trajnerit. Çfarëdo vendimi që merret, unë do të bëj më të mirën për klubin dhe respektoj çdo vendim", ka shtuar ai. Pavarësisht rivalitetit të fortë për një vend titullari, talenti dardan ka konfirmuar formën e tij pozitive sa herë që i është besuar hapësirë në ndeshjet e Serie A. Aftësitë e tij në driblim, shpejtësia dhe kreativiteti në duelet një kundër një e pozicionojnë atë si një armë taktike të rëndësishme në skemat e bardhezinjve. Ndërkohë, mbështetje publike i ka dhënë edhe ish-sulmuesi i njohur i torinezëve, Fabrizio Ravanelli, i cili ka thurur elozhe për karakterin dhe guximin e futbollistit në fushë. Sipas Ravanellit, prirja e Zhegrovës për të marrë përgjegjësi dhe për të rrezikuar me topin është pikërisht ajo cilësi që mund të bëjë diferencën në ballafaqimet e mëdha. I pyetur mbi krahasimin mes Juventusit dhe Interit, ylli kosovar ka shmangur një analizë të drejtpërdrejtë, por është përgjigjur me një mesazh që ka entuziazmuar mbështetësit e klubit. "Nuk dua të flas për këtë, por Juventusi është gjithmonë më mirë", u shpreh ai. Sa i përket caqeve sezonale, Zhegrova ka vlerësuar kapacitetin e lartë të grupit, duke kërkuar qasje fituese në çdo takim zyrtar. Objektivi i tij personal mbetet i qartë: shfrytëzimi maksimal i çdo minutëqendrimi në fushë, shtimi i hapësirave në formacion dhe dhënia e një kontributi vendimtar në realizimin e ambicieve të mëdha të Juventusit.