Qëndrimi zyrtar i PDK-së: Tri pikat kyçe për Projektligjin e Speciales pas vendimit nga Haga

Këshilli Drejtues i Partisë Demokratike të Kosovës ka zhvilluar një mbledhje urgjente pas vendimit të fundit të Dhomave të Specializuara në Hagë ndaj ish-krerëve të Ushtrisë Çlirimtare të Kosovës, duke miratuar njëzëri një Deklaratë Politike të ndarë në tri shtylla kryesore. Kjo deklaratë përfshin kërkesën urgjente për votimin e Projektligjit për Dhomat e Specializuara, ofrimin e mbështetjes financiare të pakushtëzuar nga shteti për mbrojtjen juridike të të akuzuarve, si dhe mbështetjen e pakursyer për çdo organizim popullor që kundërshton vendimet e konsideruara të padrejta nga ky tribunal. Në komunikatën e lëshuar për media, kjo parti thekson se e hedh poshtë aktgjykimin që e cilëson si thellësisht të padrejtë dhe me prapavija ndaj Hashim Thaçit, Kadri Veselit, Jakup Krasniqit dhe Rexhep Selimit, duke kundërshtuar çdo përpjekje për të njollosur pastërtinë e luftës çlirimtare apo për të vendosur shenjën e barazimit mes saj dhe krimeve të regjimit serb. PDK thekson se lufta e UÇK-së ishte e drejtë dhe u zhvillua në partneritet të ngushtë me botën perëndimore e NATO-s, ndërsa premton se do të vazhdojë të angazhohet me të gjitha mekanizmat demokratikë për mbrojtjen e të vërtetës historike dhe të drejtave të ish-udhëheqësve të saj. Në bazë të këtyre zhvillimeve, Këshilli Drejtues ka radhitur kërkesat e tij konkrete, ku e para ka të bëjë me shqyrtimin institucional të kornizës ligjore të Dhomave të Specializuara, duke i bërë thirrje Kuvendit të Kosovës që të miratojë Projektligjin e propozuar nga kjo parti me ndryshimet e nevojshme. Sipas partisë, institucionet e vendit kanë detyrimin kushtetues dhe ligjor që të sigurojnë garanci më të larta procedurale dhe transparencë, duke respektuar pavarësinë e drejtësisë por pa anashkaluar llogaridhënien institucionale. Pika e dytë e deklaratës i adresohet ekzekutivit dhe legjislativit, duke kërkuar angazhim financiar dhe institucional pa kufizim për mbrojtjen juridike të ish-krerëve të UÇK-së në fazën e shkallës së dytë.