Rruga drejt Euro 2032: Italia zyrtarizon 14 impiantet sportive në garë për të pritur turneun

Federata Italiane ka ndërmarrë një tjetër hap konkret në rrugëtimin e saj drejt organizimit të Kampionatit Evropian të vitit 2032, duke i dorëzuar zyrtarisht UEFA-s dosjen e plotë me kandidaturat e stadiumeve. Kujtojmë se Italia dhe Turqia janë vendet e bashkuara në këtë nismë për të pritur ngjarjen e madhe kontinentale. Në listën e dorëzuar figurojnë gjithsej 14 impiante, të cilat shtrihen në 13 qytete të ndryshme të vendit: Bari, Bolonja, Cagliari, Firence, Genova, Lecce, Milano, Napoli, Palermo, Roma, Salerno, Torino dhe Verona. Veçori e këtij propozimi është kryeqyteti italian, Roma, e cila është e vetmja që ka vënë në tavolinë dy alternativa: stadiumin legjendar “Olimpico” dhe projektin ambicioz për ngritjen e një impianti të ri në zonën e Pietralatës. Sipas planit, në një moment të dytë do të bëhet përzgjedhja përfundimtare e pesë stadiumeve italiane që do të shërbejnë si arena për ndeshjet e Euro 2032, ndërkohë që pesë stadiume të tjera do të caktohen nga pala turke për të plotësuar hartën e turneut.