Parashikimi i motit për fundjavë: Kthjellime, vranësira dhe ulje e temperaturave minimale

Vendi ynë gjatë kësaj fundjave do të karakterizohet nga një mot kryesisht me diell dhe vranësira të shpërndara, ndërkohë që në termometra do të vërehet një rënie e vlerave minimale. Dita e shtunë pritet të nisë dhe të vazhdojë me intervale me diell dhe vranësira të pakta, të cilat do të jenë më të theksuara në zonat malore, megjithatë nuk parashikohen reshje. Vlerat minimale të temperaturave do të luhaten nga minus 1 deri në 3 gradë Celsius, kurse ato maksimale do të arrijnë nga 18 deri në 22 gradë Celsius. Ndërkohë, drejtimi i erës do të jetë nga verilindja, me një shpejtësi prej 1 deri në 4 metra për sekondë. Edhe dita e diel do të sjellë kushte atmosferike të ngjashme, me diell dhe vranësira të ndryshueshme, pa gjasa për reshje. Temperaturat minimale do të sillen nga zero deri në 3 gradë Celsius, ndërsa ato maksimale do të shënojnë ngritje duke u pozicionuar mes 19 dhe 24 gradë Celsius. Gjatë kësaj dite, erërat do të fryjnë po nga verilindja, por me një shpejtësi më të lehtë prej 1 deri në 3 metra për sekondë. Në aspektin biometeorologjik, situata do të mbetet e qëndrueshme dhe tejet e favorshme për zhvillimin e aktiviteteve dhe shëtitjeve në natyrë. Nëse gjatë orëve të mesditës pritet një ngrohtësi më e rehatshme, mëngjeset do të vazhdojnë të jenë të freskëta për shkak të temperaturave relativisht të ulëta. Sipas parashikimeve afatmesme, më 9 dhe 10 tetor situata e motit pritet të pësojë kthesë, duke sjellë reshje shiu në të gjithë territorin e vendit. Në zonat malore me lartësi mbidetare mbi 1 200 metra, ekzistojnë mundësitë reale që reshjet të jenë në formë dëbore. Ky zhvillim atmosferik konsiderohet tejet i mirëpritur për sektorin e bujqësisë dhe përgatitjen e tokës pas një periudhe të gjatë thatësire, ndërsa detajet rreth sasisë dhe intensitetit të reshjeve do të sqarohen në vijim, bën të ditur Instituti Hidrometeorologjik i Kosovës.