Skandali financiar në Premier Ligë, Unai Emery lëshon akuza të forta ndaj klubeve angleze

Trajneri i Aston Villas, Unai Emery, ka hedhur akuza të forta se një numër i madh klubesh në elitën e futbollit anglez kanë manipuluar bilancet e tyre financiare, në një kohë kur sporti mbetet i tronditur nga një prej skandaleve më të mëdha të viteve të fundit. Zhvillimet vijnë pasi një panel i pavarur i Premier Ligës zbuloi se Manchester City kishte derdhur në mënyrë të paligjshme mbi 900 milionë paund për t'i shpëtuar ndëshkimeve nga rregullat financiare. Kjo shkelje u realizua kryesisht përmes fryrjes së vlerës së marrëveshjeve të partneritetit komercial me rreth 830,69 milionë paund nga grupi i pronarëve të klubit. Ndërkohë që klubi nga Manchesteri ka ushtruar të drejtën e apelimit kundër këtij vendimi, Emery është shfaqur si figura e parë publike në futbollin anglez që flet hapur për këtë situatë, duke sugjeruar se praktika të tilla nuk janë përdorur vetëm nga drejtuesit e këtij klubi. "Kjo është një çështje që tashmë dihej. Duke qenë se të gjithë ne kemi kufizimet tona, detyrohemi të largojmë lojtarë për të përmbushur kriteret e Fair Play-it Financiar dhe të gjejmë rrugë alternative për të afruar talente të rinj," u shpreh strategu spanjoll. Sipas tij, qëllimi i rregulloreve financiare është garantimi i një ekuilibri të shëndetshëm, ku shpenzimet kufizohen vetëm në të ardhurat e krijuara për të shmangur fryrjen artificiale të tregut. Megjithatë, ai theksoi se institucionet kompetente dhe gjykatat duhet të thonë fjalën e fundit. Në fund, Emery nuk la pa përmendur edhe aspektin sportiv, duke dhënë opinionin e tij për ekiipin e drejtuar nga Pep Guardiola: "Më vjen keq kur shoh se si po trajtohet kjo çështje, duke marrë parasysh nivelin e lojës së atij ekipi. Nën drejtimin e Guardiolës, pati periudha kur ata ishin absolutisht të pakonkurrueshëm në fushë", përfundoi ai.