Bashkim historik në Luginë: Tetë subjekte shqiptare bëhen bashkë për zgjedhjet e 25 tetorit

Iniciativa për formimin e listës së përbashkët zgjedhore “Koalicioni Shqiptar”, e cila u konkretizua përmes një marrëveshjeje mes tetë formacioneve politike nga Bujanoci, Presheva dhe Medvegja, shënon një kthesë domethënëse drejt konsolidimit të faktorit politik shqiptar në Luginën e Preshevës. Ky hap strategjik ka për qëllim që elektorati shqiptar të përfaqësohet përmes një fronti të vetëm në procesin zgjedhor parlamentar të 25 tetorit në Serbi, duke lënë përkohësisht mënjanë dallimet e natyrave të ndryshme politike. Lajmi për këtë bashkim u bë i ditur nga kryeministri i Kosovës, Albin Kurti, i cili e vlerësoi këtë bashkëpunim si një angazhim të përbashkët dhe serioz të krerëve politikë vendorë. “Pas bisedave dhe përpjekjeve për t’i afruar qëndrimet, vullneti për bashkëpunim mori formën e një zotimi të përbashkët. I falënderoj kryetarët e subjekteve politike: Shaip Kamberin (PVD), Visar Memetin (APN), Nagip Arifin (PD), Agim Sabedinin (PDSH), Shqiprim Musliun (LPD), Sami Salihun (LR), Armend Aliun (AL) dhe Naser Azirin (UDSH), për angazhimin dhe gatishmërinë që, përtej dallimeve, të gjejnë te njëri-tjetri bashkëbiseduesin dhe të ndajnë përgjegjësinë ndaj qytetarëve”, ka deklaruar ai. Sipas kreut të qeverisë kosovare, ky front i përbashkët nuk duhet të kufizohet vetëm në suaza afatshkurtra zgjedhore, por duhet të shërbejë si një platformë gjithëpërfshirëse për avokimin e të drejtave politike, institucionale, ekonomike, gjuhësore dhe kulturore të shqiptarëve që jetojnë në Medvegjë, Bujanoc dhe Preshevë. Kurti ka tërhequr vëmendjen edhe te mungesa e vendeve të garantuara, duke e sjellë këtë si një standard që duhet të zbatohet në raport me pakicat. “Bashkimi politik te Koalicioni Shqiptar sigurisht që nuk është i mjaftueshëm. Asimetria e të drejtave është po ashtu padrejtësi. Serbët në Kosovë i kanë të garantuara 10 nga 120 ulëset në Kuvendin e Republikës së Kosovës, e me këtë qasje, shqiptarët e Preshevës, Bujanocit dhe Medvegjës do të duhej të kishin së paku 5 vende të garantuara në Parlamentin e Serbisë, i cili numëron 250 ulëse. Përfaqësimi i garantuar është një parim që duhet të vlejë si në Kosovë ashtu edhe në fqiun tonë verior, me të njëjtin respekt për barazinë dhe të drejtat e tyre.” Në mesazhin e tij, ai ka theksuar se identiteti dhe të drejtat themelore janë shtyllat e këtij procesi, të cilat ndërlidhen ngushtë me luftën kundër pasivizimit diskriminues të adresave, përfaqësimin e drejtë në institucionet publike dhe zhvillimin e qëndrueshëm ekonomik. Gjuha, kultura dhe trashëgimia mbeten pjesë e pandashme e përgjegjësisë ndaj brezave të ardhshëm, për të garantuar një jetë me dinjitet në trojet e tyre. Lidhur me këtë zhvillim, Dashnim Hebibi, president i Institutit Shkencor Helvetik të Evropës Juglindore me seli në Cyrih, ka theksuar se ky bashkim politik nuk duhet të reduktohet vetëm në një koalicion të ngushtë për garën elektorale, por duhet të evoluojë në një platformë afatgjate për të ardhmen e shqiptarëve në rajon. “Marrëveshja për krijimin e “Koalicionit Shqiptar” mes subjekteve politike shqiptare të Preshevës, Bujanocit dhe Medvegjës është një zhvillim që duhet përshëndetur. Por nëse ky bashkim do të mbetet vetëm një marrëveshje për zgjedhjet parlamentare në Serbi, atëherë do të humbasë mundësinë për t’u shndërruar në një platformë të përbashkët politike për përfaqësimin dhe të ardhmen e shqiptarëve të Luginës,” ka vlerësuar ai.