Gara për Euro 2032: Italia zyrtarizon 14 impiantet që synojnë të presin Kampionatin Evropian

Federata Italiane ka ndërmarrë një hap të rëndësishëm drejt organizimit të Kampionatit Evropian të futbollit në vitin 2032, duke i dorëzuar zyrtarisht UEFA-s dokumentacionin paraprak me të gjitha stadiumet kandidate. Kujtojmë se Italia dhe Turqia janё vendet e përbashkëta që synojnë të presin këtë ngjarje të madhe sportive. Në listën e dorëzuar nga pala italiane përfshihen gjithsej 14 impiante sportive, të cilat shtrihen në 13 qytete të ndryshme të vendit: Bari, Bolonja, Cagliari, Firence, Genova, Lecce, Milano, Napoli, Palermo, Roma, Salerno, Torino dhe Verona. Interesant është fakti se kryeqyteti italian, Roma, është i vetmi qytet që ka vënë në tavolinë dy alternativa për këtë turne: stadiumin tradicional 'Olimpico' si dhe projektin ambicioz për ndërtimin e një impianti të ri në zonën e Pietralatës. Ky proces do të ketë një vijimësi, pasi në fazën e ardhshme pritet të reduktohet numri, duke zgjedhur vetëm pesë stadiume nga Italia që do të strehojnë ndeshjet zyrtare të Euro 2032, ndërsa pesë arena të tjera do të caktohen nga shteti turk.