BQK vë në funksion platformën digjitale për monitorimin e rreziqeve klimatike në sektorin financiar

Banka Qendrore e Kosovës (BQK) ka hedhur një hap të rëndësishëm drejt modernizimit të mbikëqyrjes financiare, duke prezantuar 'Panelin e Gjelbër'. Kjo platformë interaktive është dizajnuar për të ofruar një pasqyrë të detajuar të indikatorëve kryesorë që ndërlidhen me ndryshimet klimatike, mjedisin, si dhe treguesit makroekonomikë e financiarë, duke ndihmuar në vlerësimin e rreziqeve që mund të ndikojnë në qëndrueshmërinë ekonomike të vendit. Ky projekt është pjesë integrale e Planit Strategjik të BQK-së për periudhën 2024–2028, i cili synon forcimin e stabilitetit financiar përmes vendimmarrjes së bazuar në prova dhe të dhëna të sakta. Njëkohësisht, ky hap shënon zbatimin konkret të Udhërrëfyesit Strategjik për Menaxhimin dhe Mbikëqyrjen e Rreziqeve Klimatike dhe Mjedisore për vitet 2025-2027. Platforma shërben si një pikë e centralizuar informacioni, ku janë integruar të dhëna nga burime të ndryshme vendore dhe ndërkombëtare. Përmes një ndërfaqeje të standardizuar, përdoruesit kanë mundësinë të hulumtojnë, krahasojnë dhe analizojnë indikatorët sipas periudhave kohore, lokacioneve apo kategorive specifike, duke lehtësuar procesin e hulumtimit dhe raportimit. Paneli pritet të luajë një rol kyç në identifikimin e mangësive në të dhëna dhe në rritjen e transparencës për institucionet financiare, studiuesit dhe publikun e gjerë. Përmes këtij mekanizmi, BQK-ja synon të avancojë kapacitetet e saj analitike dhe mbikëqyrëse, duke mbështetur në mënyrë aktive tranzicionin drejt një ekonomie të qëndrueshme dhe të gjelbër. Në këtë iniciativë strategjike, Banka Qendrore e Kosovës ka pasur mbështetjen e Bankës Botërore, duke rikonfirmuar përkushtimin e institucionit për të ruajtur stabilitetin financiar përballë sfidave të reja mjedisore globale.