Fier: Vihet në pranga këngëtari Erind Xhaferi, akuzohet për përndjekjen e të miturave

Këngëtari nga qyteti i Fierit, Erind Xhaferi, është ndaluar në flagrancë nga strukturat e Policisë së Fierit, pasi dyshohet se është përfshirë në ngjarje që lidhen me përndjekjen dhe kryerjen e veprimeve të turpshme ndaj disa vajzave të mitura. Sipas të dhënave të para zyrtare, alarmimi i autoriteteve erdhi përmes një telefonate urgjente të kryer nga vetë të miturat në sallën operative. Vajzat kanë raportuar se janë vëzhguar dhe ndjekur në mënyrë të përsëritur, çka ka vënë menjëherë në lëvizje shërbimet e Komisariatit të Policisë Fier për të verifikuar situatën në terren. Pas ndërhyrjes dhe sigurimit të provave të para, forcat e rendit kanë arritur të identifikojnë dhe të ndalojnë në flagrancë personin e dyshuar. Më pas, ai është shoqëruar në ambientet e Drejtorisë Vendore të Policisë Fier, ku është proceduar më tej sipas përcaktimeve ligjore. Hetimet paraprake ndaj artistit po zhvillohen mbi bazën e dyshimeve për veprën penale të "Veprave të turpshme", të parashikuar nga neni 108 i Kodit Penal, i cili trajton sjelljet e pahijshme me natyrë seksuale ndaj të miturve. Autoritetet e rendit dhe organet e akuzës po bashkëpunojnë ngushtë për të zbardhur plotësisht të vërtetën dhe rrethanat e këtij rasti. Ndërkohë, dosja me materialet hetimore i është përcjellë Prokurorisë pranë Gjykatës së Shkallës së Parë të Juridiksionit të Përgjithshëm Fier, e cila do të ndërmarrë hapat e mëtejshëm ligjorë.