Skandali i videove intime/ Kompozitori Adi Hila merret në pyetje për disa orë në polici

Kompozitori i njohur Adi Hila është paraqitur para autoriteteve policore për të dëshmuar lidhur me skandalin e shpërndarjes në rrjet të disa regjistrimeve video që e shfaqnin atë në momente intime me disa figura të njohura të skenës. Gjatë marrjes në pyetje, Hila ka konfirmuar se është ai personi që ka montuar kamerat e sigurisë brenda banesës së tij, megjithatë ka hedhur poshtë kategorikisht pretendimet se qëllimi i tyre ka qenë kapja e pamjeve private. Sipas shpjegimeve të dhëna para hetuesve, pajisjet janë instaluar për motive mbrojtjeje dhe sigurie, pasi lagjja ku banon ishte bërë skenë e disa vjedhjeve. Ai ka deklaruar se kishte mbuluar me kamera të gjithë hapësirën e pronës së tij. Në dëshminë e tij, kompozitori ka sqaruar se sistemi i vëzhgimit ishte vendosur që në vitin 2022, shumë kohë para se këto materiale të dilnin në publik dhe të shkaktonin bujën e ditëve të fundit. Ai ka pretenduar se bëhej fjalë për pajisje bazike, të cilat nuk dispononin memorie për arkivimin e sekuencave, por operonin vetëm përmes rrjetit online. Ndërkohë, procesi i pyetjeve nga grupi i posaçëm i hetimit për Krimet Kibernetike vijon për të zbardhur plotësisht dinamikën e ngjarjes. Materialet filmike intime mes kompozitorit dhe artisteve nisën të qarkullonin me ritme të shpejta mbrëmjen e së martës përmes aplikacionit WhatsApp dhe rrjeteve të tjera sociale. Si pasojë e tronditjes së rëndë psikologjike, një nga artistet e përfshira u dërgua me urgjencë në spital gjatë ditës së mërkurë. Pjesë e materialeve janë publikuar edhe në faqe të ndryshme me përmbajtje për të rritur, ku të paktën njëra prej vidove rezulton të jetë hedhur atje që para një viti. Sektori i Krimeve Kibernetike është angazhuar në gjurmimin e adresave IP të profileve që bënë shpërndarjen e pamjeve, ndërsa pritet edhe një ekspertim teknik i sistemit të kamerave për të verifikuar nëse ka pasur thyerje apo akses të paautorizuar nga palët e treta. Hetimet po zhvillohen për tri vepra penale: “Përgjimi i paligjshëm i të dhënave kompjuterike”, “Ndërhyrja në të dhënat kompjuterike”, “Ndërhyrja e padrejtë në jetën private” dhe “Keqpërdorimi i pajisjeve”. Në kuadër të legjislacionit penal, cenimi i intimitetit, regjistrimi dhe shfaqja e elementeve të jetës private pa miratimin e personit, sidomos kur ato bëhen publike, përbëjnë shkelje të rënda që ndëshkohen me gjobë ose heqje lirie deri në 3 vjet. Shënim: Personi/personat e përmendur në këtë artikull, prezumohen të pafajshëm deri në një vendim të formës së prerë nga gjykata.