Arifi ashpër ndaj ekzekutivit: Qeveria po mjaftohet me fjalë, mungojnë hapat konkretë ndaj vendimit të Speciales

Analisti dhe profesori Dritëro Arifi ka drejtuar kritika të ashpra ndaj qeverisë së Kosovës, duke e akuzuar për pasivitet të plotë përballë vendimit dënues të Gjykatës Speciale ndaj ish-krerëve të Ushtrisë Çlirimtare të Kosovës. Sipas tij, reagimet e deritanishme janë kufizuar vetëm në rrafshin gjuhësor, pa ndërmarrë asnjë veprim real institucional. I ftuar në emisionin “Ora 7”, Arifi u ndal te hendeku i madh mes retorikës politike dhe veprimeve praktike nga ana e ekzekutivit. Ai theksoi se mungesa e masave nga pushteti e bën të pashmangshme kritikën publike, duke evokuar thënien se mes fjalës dhe veprës ka një distancë të madhe. Duke analizuar situatën, ai vuri në dukje se kanë kaluar tashmë 18 ditë nga shpallja e aktgjykimit dhe deri më tani nuk ka asnjë dëshmi publike se kryeministri Albin Kurti i ka drejtuar ndonjë letër homologëve të tij ndërkombëtarë. Arifi e quajti këtë qasje “zero”, duke kujtuar se komunikimi zyrtar me shkrim nuk ka ndonjë kosto financiare. Sipas tij, nëse kreu i qeverisë do të kishte ndërmarrë hapa të tillë diplomatikë, opinioni publik do të ishte në dijeni, pasi mediat perëndimore do t'i kishin bërë publike ato dokumente. Ai nënvizoi se shteti funksionon përmes procedurave zyrtare dhe letërkëmbimeve institucionale. Në fund, profesori përfundoi se deklarimet e thjeshta për “shqetësim” nuk mjaftojnë. Ai kërkoi nga qeveria që të argumentojë qartë pse ky aktgjykim është i papranueshëm, duke prezantuar faktet e plota mbi ngjarjet dhe duke dëshmuar angazhimin e shtetit përmes dokumenteve zyrtare.