Raporti i FMN-së nxjerr Kosovën në fund të Evropës për punësimin e grave, Kurti mbrohet me shifrat e ekzekutivit

Pavarësisht se statistikat ndërkombëtare e renditën Kosovën në vendin e fundit në Evropë për përfshirjen e grave në tregun e punës gjatë vitit 2024, me një shifër prej vetëm 25.9 për qind të popullsisë femërore në moshë pune, kreu i ekzekutivit, Albin Kurti, ka vënë in-focus arritjet e qeverisë së tij në këtë fushë. Këto të dhëna alarmante u bënë të ditura nga Fondi Monetar Internacionale (FMN), duke konfirmuar sfidën e madhe me të cilën ballafaqohet vendi ynë sa i përket fuqisë punëtore të gjinisë femërore. Megjithatë, duke folur në konferencën ndërkombëtare “Partneritet për ndryshim: Gratë që transformojnë sistemet – Avancimi i Parimeve të Prishtinës 2026–2035”, kryeministri në detyrë Albin Kurti ka shfaqur optimizëm, duke evidentuar punësimin e më shumë se 12 mijë grave nëpërmjet nismave shtetërore. Gjatë fjalimit të tij, kreu i qeverisë bëri thirrje që angazhimi i grave të përkthehet në hapësira më të gjera përfaqësimi dhe vendimmarrjeje, duke kërkuar zbatim rigoroz të ligjit dhe Kushtetutës në çdo nivel institucional. “Sot përgjegjësia jonë është që kontributi i tyre të shndërrohet gjithnjë e më shumë në mundësi pjesëmarrjeje dhe vendimmarrjeje. Barazia në të drejta dhe mundësi do të thotë që të drejtat e garantuara nga Kushtetuta dhe ligji të zbatohen në çdo gjykatë. Në çdo komunë, në çdo vend pune, çdo stacion policie, dhe në çdo institucion. Do të thotë që dhuna ndaj grave dhe vajzave nuk tolerohet dhe nuk durohet. Nuk justifikohet dhe nuk fshihet. Por parandalohet dhe ndëshkohet”, u shpreh ai. Kurti vuri theksin te barazia e mirëfilltë, e cila sipas tij nënkupton mundësi të barabarta në shkollim, punësim dhe role drejtuese, duke e cilësuar këtë si gur themeli për zhvillimin ekonomik dhe demokratik. “Do të thotë që çdo vajzë dhe grua të ketë qasje të barabartë në arsim, punësim dhe mundësi për të ndërtuar të ardhmen e saj. Barazia në të drejta dhe mundësi. Do të thotë gjithashtu që gratë të mos jenë vetëm votuese që përfshihen, por qytetare që marrin pjesë, që bëhen vendimmarrëse dhe udhëheqëse. Sepse një demokraci nuk mund të jetë e plotë kur gjysma e shoqërisë ngelet e nënpërfaqësuar. Fuqizimi i grave për ne nuk është vetëm çështje e barazisë gjinore, është edhe investim në zhvillimin ekonomik, social dhe demokratik të vendit. Dhe këtë e kemi shoqëruar si ekzekutiv me politika publike buxhet adekuat dhe rezultate konkrete”, shtoi kryeministri. Në vijim të fjalës së tij, Kurti paraqiti shifra konkrete nga programet e ndryshme shtetërore të mbështetjes, duke përfshirë skemat e punësimit dhe bursat e alokuara për fushat e shkencës, teknologjisë, inxhinierisë dhe matematikës (STEM). “Kemi mbështetur drejtpërdrejt punësimin e mbi 12.000 grave. Përmes superpunës nga afro 23.000 të rinjtë të punësuar, 51% janë gra e vajza. Përmes programit “Qeveria për Familjet” nga mbi 4.000 persona të punësuar nga familje ku më parë nuk punonte askush, 55% janë gra. Përmes “Kosovo Generation Unlimited” nga mbi 3.000 të rinj që kanë përfituar punë praktike, rreth 60% janë gra dhe vajza. Kemi investuar edhe në arsim dhe në profesionet e së ardhmes, janë ndarë 7.277 bursa apo përafërsisht i bie 40% të bursave në tërësi, për shkencë, teknologji, inxhinieri dhe matematikë, apo STEM, prej të cilave 97% janë për vajza. Pra, Qeveria e Republikës së Kosovës konsideron që nuk ka asgjë mashkullore në matematikë, inxhinieri, shkenca natyrore. Vajzat ia dalin shpesh edhe më mirë sesa djemtë”, përfundoi ai.