Balona e dyshimtë në Prishtinë, Gjinovci lidh rastin me metodat e rrezikshme hibride në Evropë

Zbulimi i një balone meteorologjike të pajisur me një pako të dyshimtë në kryeqytet ka sjellë në vëmendje shqetësime serioze lidhur me sigurinë publike dhe mundësinë e përdorimit të mjeteve të ngjashme për qëllime keqdashëse. Lidhur me këtë ngjarje ka reaguar Rron Gjinovci, i cili sugjeron që rasti të analizohet në një dimension më të gjerë, duke e sjellë si shembull përdorimin e taktikave të ngjashme përgjatë kufijve të Bjellorusisë me Lituaninë dhe Poloninë. Gjinovci ngre dilemën nëse kemi të bëjmë thjesht me një alarm të rremë apo me zbatimin e një taktike tashmë të njohur të sigurisë në kontinentin evropian. Më poshtë gjeni reagimin e tij të plotë të publikuar në rrjetin social Facebook: "A e dini ku është parë kjo metodë e cenimit të sigurisë publike me balona meteorologjike së fundmi? Çka nëse balona meteorologjike me bombën e rrejshme brenda, synonte Qeverinë, selinë e BE-së në Prishtinë apo ndonjë institucion tjetër afër vendit ku u gjet? Një balonë e lëshuar prej ajrit, me një pako të lidhur poshtë, është një metodë që tashmë është parë në kufijtë e Evropës. Në kufirin Bjellorusi–Lituani e Bjellorusi–Poloni, balonat meteorologjike janë përdorur në masë për me çu kontrabandë përtej kufirit. Në disa raste, këto raste kanë çu edhe deri te mbyllja e aeroporteve e ndërprerja e fluturimeve. Parlamenti Evropian i ka futë këto raste në kontekstin e operacioneve hibride që synojnë vendet e BE-së e NATO-s. Prandaj pyetja për rastin në Prishtinë është: a kemi këtu veç një alarm të rrejshëm, apo po përdoret një metodë që tashmë është pjesë e arsenalit të veprimeve hibride në Evropë? Në luftën hibride të sotme, nuk është gjithmonë nevoja me shkaktu dëm. Mjafton me kriju frikë, konfuzion, me harxhu resurse të sigurisë e me kriju një ndjenjë pasigurie."