Tragjedia e diskotekës në Koçan: Prokuroria kundërshton garancinë e Dejan Jovanovit ndërsa nesër i skadon paraburgimi

Trupi prokurorial që po heton tragjedinë e zjarrit në diskotekën "Pulse" në Koçan ka dorëzuar sot një qëndrim zyrtar negativ, duke kërkuar nga gjykata që të hedhë poshtë si të pabazuar propozimin për caktimin e masës së garancisë të paraqitur nga i akuzuari Dejan Jovanov. Në kërkesën e tij, mbrojtja kishte ofruar një garanci pasurore në vlerë totale prej 195.820 eurosh, respektivisht 12.042.932 denarë, e cila parashikohej të sigurohej përmes vendosjes së hipotekës mbi disa prona të paluajtshme. Megjithatë, organi i akuzimit argumenton se gjatë shqyrtimit të kësaj çështjeje, gjykata duhet të marrë parasysh faktin se deklarata e dhënë nga i akuzuari Dejan Jovanov është bërë në kohën kur ai ka qenë plotësisht në dijeni se një pjesë e pasurisë së propozuar i nënshtrohet tashmë procedurave të ekzekutimit, çka e bën të pamundur vendosjen e hipotekës apo arkëtimin e vlerës së saj. Sipas Prokurorisë, pasuria e paluajtshme e paraqitur përbëhet kryesisht nga objekte ndihmëse, hambarë, stalla dhe ndërtesa që dikur kanë qenë pa leje ndërtimi. Kjo do të thotë se, në rast nevoje, kthimi i këtyre pronave në para të gatshme do të ishte tejet i vështirë, dhe në asnjë mënyrë nuk do të arrinte vlerën e pretenduar në vlerësim. Kjo situatë vjen në një moment kritik, pasi nesër përfundon afati i paraburgimit njëvjeçar për të akuzuarin kryesor Dejan Jovanov-Deko lidhur me rastin e zjarrit në "Puls", kohë kjo që paraqet edhe kufirin maksimal ligjor nga dita e vlerësimit të aktakuzës.