Kurti shpall shifrat rekord: 63 për qind e punësimeve të reja në administratë i takojnë grave

Kryeministri i vendit, Albin Kurti, ka vlerësuar se gjatë mandatit të tij qeverisës është bërë një hap i rëndësishëm drejt avancimit të pozitës së gruas në shoqërinë kosovare. Gjatë fjalës së tij në konferencën ndërkombëtare të partneritetit për ndryshim, e cila u mbajt nën titullin “Gratë që transformojnë sistemet”, kreu i ekzekutivit bëri të theksuar se 63 për qind e personave të punësuar rishtazi në administratën publike janë gra. Po ashtu, ai shtoi se gjysma e anëtarëve në bordet e ndërmarrjeve publike përbëhet nga gjinia femërore. “Barazia nuk është vetëm premtim, është punë, vendimmarrje dhe buxhet”, u shpreh ai para të pranishmëve. Ndër të tjera, kryeministri theksoi se për qeverinë që ai drejton, mbështetja dhe lartësimi i rolit të gruas nuk shihet vetëm si një parim i barazisë gjinore, por si një shtyllë kyçe për zhvillimin e gjithëmbarshëm të shtetit. “Si ekzekutiv kemi mbështetur gratë”, përfundoi deklaratën e tij kryeministri.