Tmerr në Athinë: Rumuni sulmon me thikë ish-bashkëshorten dhe partnerin e saj shqiptar para syve të fëmijëve

Një ngjarje e rëndë me elementë të dhunës në familje është regjistruar në zonën e Lavrios në kryeqytetin grek, Athinë, ku një 32-vjeçar me origjinë nga Rumania ka depozituar me dhunë në banesën e ish-partneres së tij, pasi ka thyer një dritare me anë të një çekiçi. Menjëherë pas futjes në pronë, autori është përfshirë në një debat të ashpër me gruan dhe partnerin e saj aktual, situatë e cila ka degjeneruar në përdorimin e një arme të ftohtë. Si pasojë e sulmit, kanë mbetur të plagosur 32-vjeçarja dhe bashkëjetuesi i saj, i identifikuar si 33-vjeçari shqiptar Klevis Tite. Të dëmtuarit janë transportuar me urgjencë në spitalin "Asklepieion" në Voula për të marrë ndihmën e nevojshme mjekësore për shkak të plagëve të marra. Duke qenë se gjendja shëndetësore e gruas është vlerësuar si më kritike, ajo është transferuar më pas për trajtim të mëtejshëm në spitalin "Evangelismos". Në çastin e ndodhjes së krimit, brenda shtëpisë kanë qenë të pranishëm edhe dy fëmijët e mitur të çiftit, përkatësisht në moshën 1 vjeç e gjysmë dhe 2 vjeç e gjysmë, të cilët janë bërë dëshmitarë të aktit të dhunshëm. Agresori 32-vjeçar është vënë në pranga nga uniformat blu dhe është shoqëruar në Departamentin e Hetimit të Krimeve në Lavreotiki, ku mbi rëndon akuza paraprake për veprën penale të tentativës për vrasje. Sipas të dhënave nga autoritetet policore, personi në fjalë rezulton të jetë përsëritës, pasi ndaj tij ishin regjistruar pesë denoncime të kaluara për dhunë në familje, ndërsa më datë 3 shtator ai ishte arrestuar sërish për mbajtje të armëve pa leje.