Incidenti në protestën për krerët e UÇK-së në Hagë: Flet veterani Nuhi Tahiri dhe kërkon ndjese publike

Veterani dhe invalidi i luftës së Ushtrisë Çlirimtare të Kosovës, Nuhi Tahiri, ka dalë me një reagim publik lidhur me ngjarjen e tensionuar që u shënua gjatë protestës në mbrojtje të ish-krerëve të UÇK-së, të cilët po përballen me procesin gjyqësor në Hagë. Tahiri ka sqaruar se kishte marrë pjesë në këtë tubim bashkë me një shoqëri të tij për të shprehur solidaritetin me ish-udhëheqësit e UÇK-së, ndërkohë që ka shpalosur edhe detajet se çfarë çoi deri te përplasja fizike. Sipas dëshmisë së tij, një individ u ishte afruar për t'i ndalur që të kalonin në një zonë tjetër të sheshit të protestës, duke përdorur shprehje fyese. Tahiri tregon se i ishte afruar këtij personi për t'i kërkuar që të mos u bënte pengesa, mirëpo situata ka eskaluar menjëherë pas fyerjeve dhe kërcënimeve që, sipas tij, i janë drejtuar. Duke pranuar lëshimin e bërë, Tahiri ka konfirmuar se nuk ka mundur t'i përmbajë nervat dhe ka reaguar në një formë të papranueshme për rrethanat. “Dua t’i kërkoj falje protestuesve për reagimin e pamatur,” ka shkruar ndër të tjera Tahiri në shkresën e tij publike. Në mbyllje të reagimit, ai ka shfaqur konsideratë të lartë për të gjithë qytetarët e pranishëm në protestë, duke përsëritur kërkesën për ndjesë për sjelljen e tij gjatë incidentit.