Krizë në arsimin francez: Protestat radikalizohen, mijëra nxënës të ndaluar dhe qindra shkolla mbyllen

Vala e protestave të nxënësve të shkollave të mesme në Francë ka marrë përmasa shqetësuese, duke u shndërruar nga një revoltë paqësore për kushtet arsimore në përleshje të dhunshme, dëmtime të pronës publike dhe akte zjarrvënieje në mbarë vendin. Lëvizja, e cila mori hov fillimisht në rajonin e Parisit, është shtrirë tashmë në të gjithë territorin francez. Pakënaqësitë e nxënësve lidhen me klasat e mbipopulluara, mungesën e stafit mësimor, oraret e ngarkuara dhe infrastrukturën e amortizuar të shkollave, ndërsa ata kanë ngritur zërin edhe për mungesën e kushteve të përshtatshme gjatë valëve të të nxehtit. Qeveria franceze e ka cilësuar këtë situatë si “dhunë urbane”. Në përgjigje të kësaj krize, Kryeministri Sébastien Lecornu thirri një mbledhje urgjente të kabinetit të enjten, duke kërkuar nga ministrat të pezullojnë çdo angazhim tjetër për t'iu përkushtuar menaxhimit të situatës. Ndërkohë, Ministri i Arsimit, Édouard Geffray, pritet të zhvillojë takime me përfaqësues të nxënësve për të kërkuar një zgjidhje të dialoguar. Sipas të dhënave zyrtare, gjatë së enjtes janë evidentuar rreth 900 protesta dhe bllokada. Më shumë se 160 institucione shkollore janë mbyllur, ndërsa hyrjet e 30 kampuseve universitare në qytete si Parisi dhe Marseja janë bllokuar nga protestuesit. Ministria e Brendshme bëri të ditur se që nga nisja e trazirave janë ndaluar rreth 3,000 të rinj të moshës 15-18 vjeç, ku vetëm gjatë ditës së enjte janë regjistruar mbi 1,900 ndalime. Përplasjet kanë lënë prapa të lënduar në radhët e policisë, zjarrfikësve, stafit arsimor dhe vetë nxënësve. Në disa qytete, protestat kanë përshkallëzuar në vandalizëm. Në Nantes, një zjarr i qëllimshëm dëmtoi hyrjen e një shkolle, ndërsa në Marsejë situata ishte edhe më e rëndë, ku stafi u kërcënua me benzinë dhe një automjet zjarrfikës u sulmua. Në Strasburg, transporti publik u paralizua pasi protestuesit bllokuan shinat e tramvajit, ndërsa incidente të ngjashme janë raportuar edhe në Lille dhe Toulouse. Duke pasur parasysh tensionet e larta, Ministri i Arsimit Édouard Geffray njoftoi se rreth 400 shkolla do të mbyllen këtë të premte, me mundësinë e zhvillimit të mësimit në distancë në disa prej tyre. Prioriteti i ekzekutivit mbetet garantimi i sigurisë për të gjithë akterët e sistemit arsimor. Krahas përpjekjeve për normalizim, autoritetet kanë nisur hetime mbi pretendimet për përdorim të tepruar të forcës nga ana e policisë gjatë përplasjeve. Ndërkohë që lëvizja është zgjeruar edhe me studentët universitarë, qeveria mbetet në kërkim të një dialogu për të shuar tensionet që kanë përfshirë qytetet kryesore të vendit.