Start triumfues për Vëllaznimin: Gjakovarët mposhtin Prishtinën në kryeqytet

Vëllaznimi ka bërë një hap të sigurt në nisje të sezonit të ri në Superligën e Kosovës në hendboll, duke regjistruar fitoren e parë të kampionatit. Në duelin e zhvilluar të enjten në Pallatin e Rinisë në Prishtinë, skuadra nga Gjakova triumfoi ndaj vendasve të Prishtinës me rezultatin përfundimtar 37:32. Epërsia e mysafirëve u ndërtua që në pjesën e parë, të cilën e mbyllën në favor të tyre me shifrat 21:17. Ndonëse kryeqytetasit shfaqën shenja kthese në pjesën e dytë, duke e ngushtuar rezultatin në 28:26, Vëllaznimi arriti të rikthejë kontrollin e lojës dhe të sigurojë dy pikët e para në tabelë. Në këtë sukses të gjakovarëve, protagonist kryesor ishte Ardi Halili me 11 gola të shënuar, i ndjekur nga Granit Kadiri me 10 sosh dhe Mali Luzha që kontribuoi me 7 realizime. Nga ana tjetër, te Prishtina u dallua Lum Xhemajli me 8 gola, ndërsa Altin Cacaj shënoi 6 herë, kurse Fatlum Batatina dhe Enis Kuleta shtuan nga 5 gola secili.