Konjufca dënon ashpër incidentin e rrezikshëm në fluturimin e 'flydubai' drejt Tel Avivit

Zëvendëskryeministri dhe ministri i Punëve të Jashtme dhe Diasporës, Glauk Konjufca, ka reaguar zyrtarisht lidhur me sulmin e ndodhur në bordin e një avioni të kompanisë 'flydubai', i cili po kryente fluturimin drejt Tel Avivit. Në mesazhin e tij, kryediplomati kosovar e ka cilësuar këtë akt si një ngjarje të tmerrshme. Ai ka shprehur vlerësimin e lartë për veprimet e kapitenit, stafit të fluturimit dhe pasagjerëve, duke theksuar se reagimi i tyre i shpejtë dhe guximi i treguar kanë qenë vendimtarë për të shmangur një tragjedi me përmasa të rënda. "Dënoj fuqishëm sulmin e tmerrshëm në bordin e fluturimit të flydubai, i cili ishte nisur drejt Tel Avivit. Guximi i kapitenit, ekuipazhit dhe pasagjerëve parandaloi atë që mund të kishte qenë një tragjedi shkatërruese. Dhuna ndaj civilëve dhe aviacionit civil duhet të dënohet gjithmonë pa mëdyshje", ka shkruar Konjufca në platformën X. Ky qëndrim i qartë i ministrit rikonfirmon përkushtimin e Kosovës kundër çdo forme të dhunës që cenon sigurinë e qytetarëve dhe transportin ajror civil në nivel ndërkombëtar.