Dëshmia nga mbledhja e vitit 1993: Ramadan Avdiu hedh poshtë pretendimet për konflikt mes Thaçit e Allaqit

Ramadan Avdiu, një prej figurave të hershme të Lëvizjes Popullore të Kosovës (LPK), i cili ishte pjesëmarrës direkt në takimin e mbajtur në Kollare të Maqedonisë në vitin 1993, ka kundërshtuar fuqishëm versionin e Gjykatës Speciale mbi një përplasje të mundshme mes Hashim Thaçit dhe Behajdin Allaqit. Sipas Avdiut, pretendimet për tensione apo përplasje midis dy figurave të LPK-së janë të pabaza dhe të pavërteta. Ai shpjegoi se në atë takim, përkundrazi, ishte vetë Behajdin Allaqi ai që kishte kërkuar me ngulm që Hashim Thaçi të bëhej pjesë e Grupit për Organizim dhe Riorganizim, i cili do të përgatiste Mbledhjen e Përgjithshme të LPK-së. “Kjo është absolutisht e paqëndrueshme. Nuk e di se në çfarë bazohen këto pretendime. Kam lexuar disa shkrime dhe një libër, por ato janë krejtësisht të pavërteta. Debatet ishin pjesë e çdo mbledhjeje, pasi kishim për qëllim të gjenim mënyrat më të mira të organizimit tonë”, deklaroi Avdiu në një paraqitje televizive. Ai sqaroi se mbledhja në fjalë kishte karakter konsultativ dhe shërbeu për mbështetjen e aksioneve të armatosura, thirrjen për unitet dhe mobilizimin e radhëve. Në këtë kontekst, u formua një grup prej pesë personash për përgatitjen e Mbledhjes së Katërt të Përgjithshme, ku anëtarësimi i Thaçit erdhi si rrjedhojë e insistimit të drejtpërdrejtë të Behajdin Allaqit. Tutje, Avdiu theksoi se marrëdhënia mes tyre kufizohej vetëm në angazhimet profesionale dhe takimet organizative, siç ishte rasti i mbledhjes në Ujmir. Duke komentuar qasjen e Gjykatës Speciale, ai u shpreh se institucioni në fjalë po i referohet thashethemeve. Në fund, Ramadan Avdiu konfirmoi se, pavarësisht faktit që ishte dëshmitar okular i atyre ngjarjeve, deri më tani nuk ka pranuar asnjë ftesë nga Gjykata apo Prokuroria në Hagë për të dhënë dëshminë e tij.