Shifra rekord në portalin 'uslugi.gov.mk': Mbi 27 mijë kërkesa të përpunuara brenda një muaji

Portali kombëtar për shërbime elektronike, uslugi.gov.mk, ka shënuar një arritje të jashtëzakonshme gjatë muajit shtator. Sipas të dhënave të bëra publike nga Ministria e Transformimit Digjital, qytetarët dhe subjektet afariste kanë dorëzuar gjithsej 27.345 kërkesa, duke shënuar kështu muajin më të suksesshëm në historinë e kësaj platforme (pa përfshirë këtu programin e vauçerëve për TIK, që u shërbeu mbi 50 mijë studentëve). Me këtë shifër, numri total i kërkesave të procesura përmes portalit ka kapërcyer kuotën prej 400 mijë, duke arritur në 405.881. Sipas Ministrisë, ky trend rritës është pasojë direkte e shtimit të numrit të shërbimeve dixhitale, thjeshtësimit të procedurave administrative dhe intensifikimit të bashkëpunimit me institucionet për t'i bërë ato plotësisht të qasshme përmes internetit. Një kontribut të veçantë në këtë drejtim ka dhënë partneriteti me Entin Shtetëror për Statistikë, përmes të cilit janë digjitalizuar shërbime të rëndësishme, veçanërisht ato që targetojnë komunitetin akademik dhe studentët. Ministri i Transformimit Digjital, Stefan Andonovski, ka vlerësuar se këto statistika dëshmojnë ndërgjegjësimin në rritje të qytetarëve ndaj përfitimeve të shërbimeve elektronike. “Rekordi prej 27.345 kërkesash në një muaj dhe tejkalimi i pragut prej 400 mijë kërkesash në total, janë dëshmi se kur proceset janë të thjeshta dhe të arritshme, qytetarët i përqafojnë ato. Synimi ynë mbetet eliminimi i sporteleve dhe pritjeve të gjata, duke u mundësuar njerëzve që të kryejnë punët e tyre nga shtëpia apo përmes celularit, pa pasur nevojë për bartje fizike të dokumenteve mes institucioneve”, deklaroi Andonovski. Në vijim, Ministria e Transformimit Digjital mbetet e përkushtuar në modernizimin e mëtejshëm të shërbimeve, përmes Platformës së ndërveprimit dhe përmirësimit të përvojës së përdoruesit. Fokusimi strategjik do të vazhdojë të jetë te shërbimet më të kërkuara nga qytetarët dhe bizneset, me qëllim kursimin e kohës dhe reduktimin e shpenzimeve administrative. Shtatori rekord shërben si një konfirmim se ndërveprimi dixhital po shndërrohet në standardin e ri të komunikimit mes shtetit dhe qytetarëve.