Skandali i videove intime, Rozana Radi reagon ashpër dhe paralajmëron padi për shpifje

Këngëtarja e njohur shqiptare, Rozana Radi, ka thyer heshtjen përmes një reagimi publik, pasi emri i saj u lakuar së fundmi në rrjet lidhur me një histori të videove intime. Artistja ka hedhur poshtë me forcë çdo aludim se ajo është personi që shfaqet në këto pamje, duke kërkuar që spekulimet rreth saj të marrin fund menjëherë. “Theksoj qartë: unë nuk jam në asnjë prej videove të publikuara dhe nuk kam asnjë lidhje me videon që pretendohet”, ka deklaruar Radi. Ajo ka paralajmëruar gjithashtu se nuk do të tolerojë asnjë tentativë për të njollosur imazhin e saj, duke paralajmëruar hapa të prerë ligjorë. “Për këdo që tenton të dëmtojë emrin, imazhin apo reputacionin tim përmes shpifjeve dhe të pavërtetave, do të ketë kallëzim penal dhe do të japë llogari përpara drejtësisë”, është shprehur ajo. Në mesazhin e saj, këngëtarja i ka bërë thirrje publikut dhe përdoruesve të rrjeteve sociale që të tregojnë maturi dhe të mos bëhen pjesë e shpërndarjes së lajmeve të rreme që dëmtojnë rëndë dinjitetin njerëzor. “Mos shpërndani, mos amplifikoni dhe mos i jepni jetë diçkaje që prek dinjitetin dhe emrin e njerëzve pa asnjë të vërtetë pas saj”, ka shkruar Radi. Në mbyllje të reagimit të saj, ajo ka theksuar se në rast se ky sulm ndaj figurës së saj vijon, ajo do t'i drejtohet deri në fund rrugës ligjore për të vënë në vend drejtësinë. “Le të flasin faktet dhe drejtësia”, ka përfunduar Rozana Radi.