Apeli i Nasim Haradinaj nga Prishtina: Deputetët të bëhen bashkë, ndërkombëtarët na kanë zhgënjyer

Në një tubim masiv në kryeqytet, ish-nënkryetari i Organizatës së Veteranëve të Luftës së UÇK-së, Nasim Haradinaj, ka ngritur zërin për bashkimin e përfaqësuesve të popullit në Kuvendin e Kosovës. Gjatë fjalës së tij, ai ka adresuar kritika të forta ndaj faktorit ndërkombëtar, duke e akuzuar për qasjen e mbajtur ndaj vlerave dhe ngjarjeve të luftës çlirimtare. Para qytetarëve të mbledhur në shesh, Haradinaj ka kërkuar angazhim serioz për vendosjen e drejtësisë dhe zbardhjen e plotë të krimeve të luftës. Ai ka theksuar se Kuvendi i Kosovës duhet të tregojë pjekuri dhe të marrë mbi vete peshën e vendimeve që i takojnë. Duke u fokusuar te ligjvënësit, ai u bëri thirrje të drejtpërdrejtë: “Ju 100 deputetët që jeni atje, të 100-tit, secili me përgjegjësinë e vet dhe me peshën që ka kërkuar vetë me u ngarku, qoftë të votës, qoftë të premtimeve, ju thërrasim për bashkim! Bashkim! Bashkim!”. Në fjalimin e tij, Haradinaj u ndal edhe te roli i ndërkombëtarëve, duke kujtuar se besimi i dikurshëm i qytetarëve u ndërtua mbi aleancën e përbashkët për liri. Megjithatë, sipas tij, ky besim është cënuar rëndë përgjatë viteve. “Ndërkombëtarët, që ju besuam sepse i patëm bindur të na ndihmojnë në luftën e UÇK-së dhe bashkë të fitojmë. Ata u ndanë pa viktima sepse ne na kishin këtu. Ata morën mburrjen, ne morëm lirinë. Por tani ju themi: Na keni tradhtuar dhe na ktheni besimin!”, u shpreh ai para protestuesve. Duke vijuar fjalën, ai përsëriti se e vetmja kërkesë e kësaj proteste mbetet drejtësia e mirëfilltë, duke hedhur poshtë çdo tentativë për keqpërdorim të dosjeve apo ngjarjeve që lidhen me të kaluarën e lavdishme të vendit. “Ne kërkojmë vetëm drejtësi! Drejtësi dhe zbulim të krimeve patjetër, sepse shumë herë po mundohen ta keqpërdorin. Kosova ka ngritur institucione, ka njerëz profesionalisht që drejtësinë ta çojnë në vend”, shtoi Haradinaj. Në vijim, ai reagoi ashpër kundër mënyrës se si po trajtohen krimet e kryera ndaj popullsisë civile, duke mos pranuar që masakrat të cilësohen thjesht si episode të izoluara. “Ndërkombëtarë nuk mund të mashtroni se janë raste individuale. Nuk pranojmë të ofendohen 400 të ekzekutuarit në masakra, nuk pranojmë të ofendohen fëmijët tanë, nuk pranojmë të ofendohet gjaku ynë!”, u shpreh ai me ton të lartë. Në mbyllje të tubimit, Haradinaj dha një mesazh solidariteti për ish-krerët e UÇK-së që po përballen me gjykimin në Hagë, duke përmbyllur fjalimin me thirrje tradicionale për luftën dhe bashkimin kombëtar. “Rroftë UÇK-ja! Nga sot e tutje, të gjithë UÇK! Lavdi dhe shokëve atje në Hagë ju përshëndes! Nasimi, që ju jeni në Hagë e këta këtu, ose do t’ju sjellim juve këtu, ose do të vijmë atje! Rroftë UÇK-ja”, përfundoi Haradinaj.