29-vjetori i protestave studentore, Kurti bën homazhe te varri i rektorit Ejup Statovci

Kryeministri i Republikës së Kosovës, Albin Kurti, ka përkujtuar 29-vjetorin e protestave historike studentore, duke bërë homazhe dhe vendosur lule të freskëta te varri i ish-rektorit dhe intelektualit të shquar, profesor Ejup Statovci. Duke evokuar ngjarjet e 1 tetorit 1997, kreu i ekzekutivit vlerësoi se ajo datë shënoi thyerjen e heshtjes nën regjimin okupues, zhdukjen e pasivitetit dhe bashkimin mbarëpopullor rreth kauzës së studentëve. “Duke ju falënderuar Rektorit të atëhershëm, Profesor Ejup Statovcit, protestat studentore u ngritën në nivel të Universitetit të Prishtinës dhe kemi qenë bashkë mësimdhënësit edhe ne studentët, me 1 tetor të vitit 1997, kur u thye heshtja nën okupim, u davarit pasiviteti që ekzistonte dhe i gjithë populli u bë bashkë me studentët që e shndërruan rezistencën në aktive dhe i dhanë një dinamikë të re politikës në Kosovë”, u shpreh Kurti. Kryeministri shtoi se protesta kishte për qëllim lirimin e hapësirave universitare, ndërsa theksoi rolin udhëheqës të profesor Statovcit në ballë të stafit akademik dhe studentëve. “Ne kërkonim lirimin e objekteve universitare. Universiteti i Prishtinës ishte Universitet i Republikës së Kosovës dhe Profesor Ejup Statovci ishte në ballë të studentëve dhe të gjithë mësimdhënësve”, shtoi ai. Gjatë fjalës së tij, Kurti përmendi përmasat e atëhershme të lëvizjes studentore, e cila numëronte rreth 20 mijë studentë dhe një mijë pedagogë. “Atëbotë kanë qenë diku 20 mijë studentë dhe një mijë mësimdhënës dhe Rektori Statovci ka qenë udhëheqës, ka qenë profesor shumë i nderuar, ka qenë akademik, por edhe njëkohësisht i urtë, por i vendosur. I mençur, por aktiv. Profesor, po me studentët”, deklaroi kryeministri. Duke vënë in-relief kontributin e jashtëzakonshëm të tij, kreu i qeverisë veçoi vitin 1991, periudhë kur Statovci mori përsipër rifillimin e veprimtarisë së Universitetit të Prishtinës pas dëbimit të dhunshëm nga kampusi. “Kurrë nuk e harrojmë edhe vitin 1991, se unë besoj që ai është momenti kur ai e ka dëshmuar veten në lartësinë e duhur edhe historike do të thosha, kur e ka rifilluar Universitetin e Prishtinës, pasi që na kishin dëbuar nga objektet universitare”, u shpreh ai. Ai gjithashtu bëri një paralelizëm historik, duke e cilësuar sfidën e Statovcit në vitin 1991 si jashtëzakonisht të rëndë, madje edhe më të vështirë se vetë themelimi i universitetit dy dekada më parë. “Mbase Ejup Statovci kur e ka rifilluar Universitetin e ka pasur edhe më vështirë në vitin 1991, sesa dy dekada para atij viti kur u pat themeluar Universiteti i Prishtinës. Pra, mund të themi që Ejup Statovci nuk e ka pasur më lehtë se Dervish Rozhaja, mbase veçse më vështirë”, theksoi Kurti. Në përmbyllje, kryeministri e quajti Universitetin e Prishtinës si institucionin kryesor të shqiptarëve në ish-Jugosllavi përgjatë gjysmës së dytë të shekullit XX, duke lidhur homazhet për rektorin me vetë themelet e këtij tempulli të dijes. “Prandaj, edhe nderimi që ja bëjmë Profesor Ejup Statovcit, është edhe nderim Universitetit, këtij tempulli të dijes e të shkencës, po njëkohësisht edhe të qëndresës e të politikës”, përfundoi Kurti.